න්නාරම, වවුනියාව සහ මුලතිව් දිස්ත්‍රික්කයන් හි නීතිඥයවරු එලෙස නඩු කටයුතුවලින් ඉවත්ව වැඩ වර්ජනයක නිරත වූහ.
නීතිඥයවරුන් නඩු කටයුතුවලින් ඉවත්වීම නිසා උතුරු පළාතේ අධිකරණයන් හි දෛනික කටයුතු අඩාලවීම හේතුවෙන් පැමිණි පිරිස් දැඩි අපහසුතාවට පත්ව සිටි අතර නීතිඥයන් නොමැතිවීම හේතුවෙන් අධිකරණයන් හි නඩු විභාග කල්දැමීම පමණක් එහිදී සිදුවිය.
මුලතිව් දිස්ත්‍රික් නීතීඥයවරුන් ටි.සරවණරාජා මහෙස්ත්‍රාත්වරයාට එල්ලවූ තර්ජන සම්බන්ධයෙන් විධිමත් පරීක්ෂණයක් සිදුකොට අදාල පුද්ගලයන්හට නීතිය ක්‍රියාත්මක කරන ලෙස බලධාරීන්ගෙන් ඉල්ලා වැඩ වර්ජනයේ නිරතවන අතර විසඳුමක් ලැබෙනතුරු තමන් අඛණ්ඩව අධිකරණ කටයුතු වර්ජනයේ නිරතවන බවත් මුලතිව් නීතීඥයවරුන්ගේ සංගමය පවසයි.
ජීවිත තර්ජන ඇතැයි පවසමින් මුලතිව් දිසා විනිසුරු සහ මහේස්ත්‍රාත් ලෙස කටයුතු කළ ටී. සරවණරාජා සිය ධුරයන් ගෙන් ඉල්ලා අස්වී තිබේ.
ඔහු 2023 සැප්තැම්බර් 23 දාතමින් අධිකරණ සේවා කොමිෂන් සභාවේ ලේකම්වරයාට ලිපියක් යොමු කර ඇති අතර තමන් දරණ ලද සියලුම තනතුරු වලින් ඉල්ලා අස්වීමට තීරණය කළ බව එහි සඳහන් කර තිබේ.
තමන්ගේ ජීවිතයට ඇති තර්ජන සහ අධික මානසික පීඩනය හේතුවෙන් මෙම තීරණය ගත් බව අදාළ ලිපියේ සඳහන්ය.
සරවණරාජා විනිසුරුවරයා ධුරයෙන් ඉල්ලා අස්වීමෙන් පුරප්පාඩු වූ ධුරය සඳහා, අධිකරණ සේවා කොමිෂන් සභාව විසින් නව විනිසුරුවරයෙකු පත් කරනු ලැබීමට නියමිතය.
‘මේ ගැන සොයා බලනවා’
මුලතිව් දිසා විනිසුරු සහ මහේස්ත්‍රාත් ටී. සරවණරාජා ඉල්ලා අස්වූ බවට සමාජ මාධ්‍ය ඔස්සේ සංසරණය වන ලිපිය සම්බන්ධයෙන් අධිකරණ අමාත්‍ය විජේදාස රාජපක්ෂගෙන් කරුණු විමසු අවස්ථාවේදී අමාත්‍යවරයා බීබීසි සිංහල සේවයට පැවසුවේ තමන් ඒ ගැන සොයා බැලූ බවයි.
” මට දැන ගන්න ලැබුණා මේ ගැන. ඒ පිළිබඳව මා සොයා බැලීමක් කළා” යැයි අමාත්‍යවරයා පැවසුවේය.
මෙම විනිසුරුවරයා අභියාචනාධිකරණය හමුවේ විභාගවන නඩු පහකට අදාළව වගඋත්තරකරුවෙකු ලෙස නම් කර සිට ඇතැයි අධිකරණ අමාත්‍යවරයා සඳහන් කළේය.
ඒ සඳහා උපදෙස් ගැනීම සඳහා විනිසුරුවරයා සිය කැමැත්තෙන්ම නීතිපතිවරයා හමුවීමට ගොස් ඇත්තේ අදාළ නඩුවල වගඋත්තරකරුවෙකු නිසා බවද ඔහු පැවසීය.
අමාත්‍ය විජයදාස රාජපක්ෂ පැවසුවේ, විනිසුරුවරයාට ජීවිත තර්ජනයක් තිබුණේ නම් විනිසුරුවරයෙකු ලෙස ඒ සඳහා වරෙන්තුවක් නිකුත් කිරීමේ හැකියාව හා බලය ඔහුට තිබූ බවය.
මෙම විනිසුරුවරයා සතියකට පමණ පෙර කොළඹට පැමිණ සිය මෝටර් රථයද විකුණා ඇති අතර ඔහු බටහිර රටවල තානාපතිවරුන් දෙදෙනෙකුද හමුවී මෙලෙස ධුරයෙන් ඉවත්ව ඇති බවට තොරුතුරු සොයා බැලීමේදී අනාවරණය වූ බව අමාත්‍යවරයා වැඩිදුරටත් ප්‍රකාශ කළේය.
theleader.lk
