ආගමික ඇදහිල්ලට බාධා කරමින් බෞද්ධ භික්ෂුන්, සිංහලයන් හා ඊට සහාය දැක්වූ පොලිසියට එරෙහිව ගොනු කළ පැමිණිල්ල ඊයේ [20] විභාගයට ගත් අවස්ථාවේදී මුලතිව් මහේස්ත්‍රාත් ටි. සරවනරාසා නියම කෙළේ අදාළ සිද්ධිය ගැන පුරාවිද්‍යා නිලධාරීන්ගේ වාර්තාවක් අගෝස්තු 08 වැනිදාට ඉදිරිපත් කරන ලෙසයි.
අගතියට පත් හින්දු බැතිමතුන් වෙනුවෙන් කරුණු දැක්වූ නීතිඥ එස්. ධනංජයන් විසින් පොංගල් පුජාවට බාධා කිරීමට අදාළ සේයා රූ සහ වීඩියෝ, මානව හිමිකම් කොමිසමට සහ මුලතිව් පොලිසියට කළ පැමිණිලි වල පිටපත් සමග අධිකරණයට ඉදිරිපත් කර ඇත.
එම ස්ථානයේ සාමය ආරක්ෂා කිරීම සඳහා මැදිහත් වූ බවයි තම නිදහසට කරුණු දක්වමින් පොලිසිය කියා ඇත්තේ.
සිය ඉන්දීය නිල සංචාරයට පිටත්වීමට මත්තෙන් ජනාධිපති රනිල් වික්‍රමසිංහ හමුවූ තමිල් ඊළාම් ජනතා විමුක්ති සංවිධානයේ නායක, පාර්ලිමේන්තු මන්ත්‍රී ධර්මලිංගම් සිද්ධාර්ථන්ට ජනාධිපතිවරයා කියා ඇත්තේ පොලිසියේ බාධා කිරීම් ගැන සම්පුර්ණ පැමිණිල්ලක් ඉදිරිපත් කරන ලෙසයි. ” පොංගල් පුජාවට බාධා කරපු නියෝජ්‍ය පොලිස් අධිකාරි සමුද්‍රජීව ඇතුළු පොලිස් නිලධාරීන්ට එරෙහිව පියවර ගන්න ජනාධිපතිතුමා පොරොන්දු වුණා,” යැයි PLOTE නායකයා පවසයි.
1933 වසරේදී ගැසට් නිවේදනයක් මගින් පුරාවිද්‍යා භූමියක් ලෙස ප්‍රකාශයට පත් කිරීමෙන් අනතුරුව උසාවි නියෝග නොතකා බෞද්ධ විහාරයක් ඉදිකරමින් 2018 වසරේ සිට බලහත්කාරයෙන් කුරුන්තුර්මලේ වැඩසිටින ගල්ගමුවේ සාන්ත බෝධි හිමියන් ප්‍රමුඛ පිටතින් රැගෙන ආ භික්ෂුන් හා සිංහලයන් විසින් ජුලි 14 සිකුරාදා පැවති පොංගල් පුජාවට බාධා කළ බව පාර්ලිමේන්තු මන්ත්‍රී ධර්මලිංගම් සිද්ධාර්ථන් මෙහිදී පෙන්වා දී තිබේ.
හින්දු බැතිමතුන්ගේ පොංගල් පුජාව පැවැත්වීමට උසාවියේ අනුමැතිය මෙන්ම පුරාවිද්‍යා නිලධාරීන්ගේ අනුමැතිය ලැබී තිබියදී කිලිනොච්චි/ මුලතිව් නියෝජ්‍ය පොලිස් අධිකාරි එච්. සමුද්‍රජිව සහාය ලබා දෙමින් හින්දු බැතිමතුන් බලහත්කාරයෙන් එම ස්ථානයෙන් ඉවත් කිරීමට ක්‍රියා කළේ පිටතින් රැගෙන විත් සිටී භික්ෂුන්ගේ හා සිංහල කොටස් වල පොංගල් විරෝධයට සහාය දක්වමින්ය.
ආගම ඇදහීමේ අයිතිය උල්ලංඝනය කළ බවට උතුරු පළාත් සභාවේ හිටපු මන්ත්‍රී තුරෙයිරාසා රවිහරන්, බහුජන සංවිධාන ක්‍රියාධරයන්වූ පීටර් ඉලන්චේලියන්, ඇන්ටනි ජයන්තන් සහ රත්නම් ජෙගදීසන් මෙන්ම සිද්ධිය වාර්තා කිරීමේදී පොලිසිය තර්ජනය කළ බවට මාධ්‍යවේදී විජයරත්නම් සරවනන් විසින් ද වවුනියාවේ ශ්‍රී ලංකා මානව හිමිකම් කාර්යාලයට පැමිණිලි කර ඇත.
හිටපු පළාත් සභිකයා සහ දෙමළ ක්‍රියාධරයන් විසින් මුලතිව් පොලිසිය වෙත ජුලි 14 වැනිදා පැමිණිලි කර සිටියේ උසාවියේ අවසරය ඇතිව කුරුන්තුර් මලේ ආදි සිවන් අයියර් කෝවිලේ පවත්වන්නට ගිය ආගමික වතාවත් වලට බෞද්ධ භික්ෂුන් සමග පොලිස් නිලධාරින්ද බාධා කළ බවයි.
එම පැමිණිලි පිටපත් උතුරේ සංචාරයක නිරත කැනඩා මහ කොමසාරිස් එරික් වොල්ෂ් වෙතද භාරදී තිබේ.
යාපනයේදී, කිලිනොච්චියේදී සහ මුලතිව්හිදී හමුවූ පුද්ගලයන් සමග ‘යුක්තිය හා වගඋත්තරදායකත්වය නොමැති වීම ඇතුළු සමාජ/ දේශපාලනික කරුණු සාකච්ඡා කළ’ බව කැනඩා නියෝජිතයා පවසා තිබුණි.
මහ කොමසාරිස් උතුරේ දෙමළ ජනතාව මුණගැසීම හිටපු මහජන ආරක්ෂක ඇමැතිගේ කෝපයට හේතුවී තිබේ.
‘අවුරුදු 2000 කට වඩා පැරණි දාගැබක් විනාශ කිරීමට තැත් කළ’ දෙමළ ජනයා සහ ඔවුන්ගේ දේශපාලකයන් (රවිහරන්) ‘හමුවීමට ඔහු (මහ කොමසාරිස් වොල්ෂ්) යයි’ යනුවෙන් රියර් අද්මිරාල් සරත් වීරසේකර සමාජ මාධ්‍ය යොදා ගනිමින් ප්‍රකාශ කර ඇත.
මේ අතර මාධ්‍ය වෙත අදහස් දක්වමින් දෙමළ ජාතික සන්ධානයේ නායක, පාර්ලිමේන්තු මන්ත්‍රී ආර්. සම්බන්ධන් කියා සිටියේ කුරුන්තුර්මලේ පොංගල් පුජාව කඩාකප්පල් කිරීම මගින් පෙන්නුම් කරන්නේ බෞද්ධ භික්ෂුන්, සිංහල අන්තවාදී කණ්ඩායම් හා පොලිසිය විසින් දෙමළ ජනයාට එරෙහිව කෙරෙන කරදර හිරිහැර නිමාවක් නොමැති බවයි.
” දෙමළ ජනයාගේ ආගමික නිදහසට එල්ල කෙරෙන ප්‍රහාරයන් ගැන ජාත්‍යන්තර අවධානය යොමු වෙන්න ඕනා, ” යැයි දෙමළ ජාතික සන්ධානයේ නායකයා පවසන්නේ කුරුන්තුර් මලේ සිදුවීම පිළිකුලෙන් හෙළා දකිමිනි.
බෞද්ධ භික්ෂුන් හා සිංහල කණ්ඩායමක් සමග කුරුන්තුර්මලේ පුරාවිද්‍යා වැඩබිමට කඩා වැදී අධිකරණ විමර්ශන වලට බාධා කළ, පසුව පාර්ලිමේන්තු වරප්‍රසාද යොදා ගනිමින්, මුලතිව් මහේස්ත්‍රාත්වරයාට තර්ජනය කළ ආණ්ඩුවේ මන්ත්‍රී සරත් වීරසේකරට එරෙහිව බලධාරීන් මෙතෙක් කිසිදු පියවරක් ගෙන නොමැත.
theleader.lk
