උතුරු පළාතේ දිස්ත්‍රික්ක පහම නියෝජනය කරමින් ඔක්තෝබර් 3 වැනි අගහරුවාදා පෙරවරුවේ මුලතිව් අධිකරණ සංකීර්ණයට රැස්වු නීතිඥයන් එහි සිට විරෝධතා පෙළපාලියකින් මුලතිව් වටරවුම දක්වා ගමන් කර ආපසු අධිකරණ සංකීර්ණය වෙත පැමිණ සාමකාමී උද්ඝෝෂණයක් දියත් කර තිබිණ.
විනිසුරුවරුන්ගේ රාජකාරියට ඇඟිලි ගහන්න එපා, අධිකරණයේ නිදහස ආරක්ෂා කරමු, නීති ඇමතිතුමනි, අසාධාරණයට අනුබල දෙන්න එපා, විනිසුරුවරුන්ගේ ආරක්ෂාව අඩු කරන්න එපා, ආදී සටන් පාඨ පෙරටු කරගනිමින් විරෝධතාවය දියත් කළ නීතිඥයන් මුලතිව් දිසා සහ මහේස්ත්‍රාත් විනිසුරු ටී. සරවණරාජා ට එල්ල වු ජීවිත තර්ජන සම්බන්ධයෙන් ස්වාධීන පරීක්ෂණයක්ද ඉල්ලා සිටි බව පළාත් බද වාර්තාකරුවෝ පවසති.
නීතිඥයන් සටන් පාඨද අතැතිව විරෝධතා පෙළ පාලියේ ගමන් කරද්දී, නිල ඇදුමින් රාජකාරියේ සිටි පොලිස් නිලධාරීන් ජංගම දුරකථන මගින් මෙන්ම කැමරා මගින්ද ඔවුන්ගේ සේයා සහ වීඩියෝ දර්ශන ලබා ගන්නා ආකාරයද මාධ්‍යවේදීන් විසින් වීඩියෝ ගත කර තිබේ.
හින්දුන් මෙන්ම බෞද්ධයන් ද අයිතිය කියා පාන කුරුන්තුර්මලේ පුරා විද්‍යා භුමියේ අධිකරණ නියෝග නොකතා කුරුන්දි විහාරය ඉදිකිරීම සම්බන්ධයෙන් වන නඩුව විභාග කළ මුලතිව් දිසා සහ මහේස්ත්‍රාත් විනිසුරු ටී. සරවණරාජා අධිකරණ සේවා කොමිෂන් සභාවේ ලේකම් වෙත සිය ඉල්ලා අස්වීමේ ලිපිය යොමු කරමින් පසුගියදා දැනුම් දී තිබුනේ තමන්ට එල්ල වී ඇති ජීවිත තර්ජනය හේතුවෙන් අධිකරණ විනිසුරු තනතුරින් ඉල්ලා අස්වන බවයි.
“මා හට එල්ල වී ඇති ජීවිත තර්ජන සහ දැඩි ආතතිය හේතුවෙන්, මා හොබන දිසා විනිසුරු තනතුරින්, මහේස්ත්‍රාත් තනතුරින්, පවුල් අධිකරණ විනිසුරු තනතුරින්, ප්‍රාථමික අධිකරණ විනිසුරු තනතුරින්, සුලු හිමිකම් අධිකරණ විනිසුරු තනතුරින්, බාලක අධිකරණ විනිසුරු තනතුරින් ඉල්ලා අස්වන බව මෙයින් දැනුම් දෙමි.”
නියෝග ආපසු හැරවීම
කුරුන්තුර්මලේ පුරාවිද්‍යා භුමියේ ඉදිකර ඇති කුරුන්දි විහාරයේ වැඩ අත්හිටුවමින් දී ඇති නියෝග ආපසු හරවන ලෙස නීතිපති දෙපාර්තමේන්තුව විනිසුරු වරයාට බලපෑම් කළ බව දෙමළ ජනමාධ්‍ය වාර්තා කර තිබේ.
කොළඹින් පලකෙරෙන ජනමාධ්‍ය පවසන්නේ විනිසුරුවරයා වගඋත්තරකරුවකු ලෙස නම් කරමින් ඔහු දුන් තීන්දු අවලංගු කරන නියෝග ඉල්ලා ගොනු කොට ඇති පෙත්සම් තුනක් සම්බන්ධයෙන් ඔහු වෙනුවෙන් පෙනී සිටීමට කරන ලද ඉල්ලීමක් අනුව නීතිපති කාර්යාලයේ සාකච්ඡාවක් පැවති නමුත් බලපෑමක් නොකෙරුණු බවයි.
මුලතිව් විනිසුරුවරයා විදේශගතව සිටින බව නීතිපති දෙපාර්තමේන්තුව උපුටා දක්වන අගනුවර ජනමාධ්‍ය පවසයි.
මහේස්ත්‍රාත් ටී. සරවනරාජාගේ ඉල්ලා අස්වීම සම්බන්ධයෙන් පූර්ණ පරීක්ෂණයක් සිදු කරන ලෙස ජනාධිපති රනිල් වික්‍රමසිංහ විසින් ජනාධිපති ලේකම් සමන් ඒකනායක වෙත උපදෙස් ලබා දී ඇති බව ජනමාධ්‍ය වාර්තා කර තිබේ.
පූර්ණ විමර්ශනයක් කරන ලෙස අපරාධ පරීක්ෂණ දෙපාර්තමේන්තුවට (CID) නියෝග කර ඇතැයි මහජන ආරක්ෂක අමාත්‍ය ටිරාන් අලස් පවසයි.
මුලතිව් අධිකරණය සංකීර්ණය ඉදිරිපිටදී ඔක්තෝබර් 3 වැනි අගහරුවාදා දියත් කළ විරෝධතාවයට එක්ව සිටි වව්නියාව නීතිඥ සංගමයේ නීතිඥ සෙනරත් වනිගසිංහ සදහන් කළේ මහේස්ත්‍රාත්වරයාට එල්ල කර තිබෙන බලපෑම තරයේ ප්‍රතික්ෂේප කරන බවයි.
“මුලතිව් දිසා අධිකරණයේ විනිසුරුතුමාට මේ කරලා තියන බලපෑම ඉතාමත්ම තරයේ ප්‍රතික්ෂේප කරනවා. අපේ සියළුම සිංහල නීතිඥවරුත් මෙම සහෝදර උතුරේ නීතිඥවරුත් සමග අපි සේවය කරන අපේ සියළුම සහෝදර නීතිඥවරුත් සහෝදරයෝ වශයෙන් අපි මෙම බලපෑමට විරෝධතාවය ප්‍රකාශ කරනවා.”
නීතිඥ සෙනරත් වනිගසිංහ තව දුරටත් සදහන් කළේ දේශපාලනඥයන් පටු අරමුණු වෙනුවෙන්, තමන්ගේ ඡන්ද ලාභය වෙනුවෙන්, තමන්ගේ වාසීන් වෙනුවෙන් රටේ ජනතාවගේ නීතියේ අයිතියට එරෙහිව සිදු කරන ප්‍රහාරයට හෙළා දැකීමට ලංකාවේ සියළු ජාතීන් නියෝජනය කරමින් නීතිඥයන් සිව් දෙසින් එකරාශි වන බවයි.
“ලංකාවේ සියළුම සහෝදර උතුරු, නැගෙනහිර, දකුණ, බස්නාහිර, පළාත්වල සිංහල, දෙමළ, මුස්ලිම් සියළුම සහෝදර නීතිඥවරු එකාවන්ව මෙම සටනට එකතුවෙනවා කියන එක මෙම අවස්ථාවේ මං ප්‍රකාශ කර සිටිනවා. ”
මහේස්ත්‍රාත් ටී. සරවනරාජාගේ අධිකරණ තීන්දු සරත් වීරසේකර මන්ත්‍රීවරයා විසින් කිහිපවර පාර්ලිමේන්තුවේදී අභියෝගයටද ලක් කර තිබු අතර වරක් සරත් වීරසේකර මන්ත්‍රීවරයා මුලතිව් මහේස්ත්‍රාත් වරයා මානසික ආබාධයකින් පෙළෙන බව තහවුරු කිරීමට පාර්ලිමේන්තුවේ දී මහත් උත්සාහයක් ගෙන තිබුනි.
“මේ අදාල මහේස්ත්‍රාත් වරයා සම්බන්ධයෙන් ප්‍රකාශයක් කරලා තියනවා ඔහු මානසික ආබාධයකින් පෙළෙනවා කියලා. කවුද ඒ ප්‍රකාශය කරලා තියෙන්නේ. ඒ ප්‍රකාශය කරලා තියෙන්නේ ඔහුගේම බිරිද. ඒ මහේස්ත්‍රාත්වරයා මුලතිව් පොලීසියට පැමිණිල්ලක් කරනවා එයාගේ නිවසේ සොරකමක් උනා කියලා. ඒ නඩුව තමයි බී 62/22 . මුලතිව් උසාවියේ තමයි ඒ නඩුව විභාග කරන්නේ. ඒ නඩුවේ විමර්ශනයේ දී ඒ මහේස්ත්‍රාත් වරයාගේ බිරිද පොලීසියට ප්‍රකාශයක් කරනවා මොහු මානසික ආබාධයකින් පෙළෙනවා ඒ නිසා මම මගේ ස්වාමි පුරුෂයාව මානසික වෛද්‍යවරයකු ලගට ගෙනියනවා කියලා. ”
මිනිස් දම්වැල් විරෝධයක්
මුලතිව් අධිකරණ සංකීර්ණය ඉදිරිපිටදී දියත් කළ නීතිඥ විරෝධතාවයට සමගාමීව නැගෙනහිර පළාතේ අධිකරණ ඉදිරිපිටදී සාමකාමී විරෝධතා දියත් වු බව පළාත් බද වාර්තාකරුවෝ පවසති. මුලතිව් විරෝධතාවයට පැමිණිමට නොහැකි වු උතුරු පළාතේ නීතිඥයන් ඊයේ (03) දිනයේ වැඩ වර්ජනය කරමින් එයට සහාය පළ කර තිබේ.
“මේ තර්ජනයෙන් සියලුම සුළු ජාතීන්ට දෙන පණිවිඩය තමයි, උඹලා අපිට විරුද්ධව ගියොත් වෙන දෙ මේක තමයි,” යනුවෙන් වව්නියාව නීතිඥ සංගමයේ සභාපති ඇන්ටන් පුනිදනායගම් පැවසීය.
මහේස්ත්‍රාත්වරයාට එල්ල වු තර්ජනය හෙළා දැකීම වෙනුවෙන් උතුරු පළාතේ නීතිඥයන් සති දෙකක කාලයක් කළු මුඛවාඩම් පැළද රාජකාරියේ යෙදෙන බව ඔහු වැඩි දුරටත් කියා සිටියේය.
මේ අතර දෙමළ දේශපාලන පක්ෂ 7 ක් එකාබද්ධව ඔක්තෝබර් 4 වැනි බදාදා යාපනය මරදනාරුමඩම් සිට යාපනය නගරය දක්වා මිනිස් දම්වැල් විරෝධයක් පැවැත්වීමට කටයුතු සංවිධානය කර තිබේ.
හෙළා දැකීම්
මුලතිව් දිසා සහ මහේස්ත්‍රාත් විනිසුරු ටී. සරවණරාජා එල්ල වු තර්ජනය දෙමළ දේශපාලනඥයන් කිහිප දෙනෙකු විසින්ම හෙළා දැක තිබුනි.
නිවේදනයක් නිකුත් කරමින් යාපනය දිස්ත්‍රික් පාර්ලිමේන්තු මන්ත්‍රී ශිවඥානම් ශ්‍රී ධරන් අවධාරණය කරන්නේ අධිකරණයට තර්ජනයක් එල්ල වී ඇති මේ මොහොතේ ජාත්‍යන්තරය ඒ සම්බන්ධයෙන් අවධානයෙන් කටයුතු කළ යුතු බවයි.
“අධිකරණයට තර්ජනය එල්ල වෙලා තියන මේ රටේ ආගම්වාදී ආක්‍රමණයන් සහ මර්දනය කොතරම් ප්‍රබලද කියන එක ගැන ජාත්‍යන්තරය අවධානයෙන් කටයුතු කරන්න ඕන.”
සමාජ මාධ්‍ය ඔස්සේ සටහන් තබමින් දෙමළ ප්‍රගතිශීලි පෙරමුණේ නායක, පාර්ලිමේන්තු මන්ත්‍රී මනෝ ගනේෂන් පෙන්වා දෙන්නේ සරවනරාජා මහේස්ත්‍රාත්වරයාට එල්ල වු ජීවිත තර්ජනයත් සමග රටේ නීතියේ ආධිපත්‍ය සෘජුව අභියෝගයට ලක්ව ඇති බවයි.
” මුලතිව් දිස්ත්‍රික් විනිසුරු සරවනරාජාගේ ජීවිතයට තර්ජනයක්. රටේ පවතින නීතියේ ආධිපත්‍ය කෙලින්ම අභියෝගයට ලක්ව තිබේ….. මේක මම හෙලා දකිනවා.”
දෙමළ ජාතික ජනතා පෙරමුණ වෙනුවෙන් නිවේදනයක් නිකුත් කරමින් එහි මාධ්‍ය ප්‍රකාශය නීතිඥ කනගරත්නම් සුගාස් පවසන්නේ මහේස්ත්‍රාත්වරයාට එල්ල වු තර්ජනය දෙමළ ජනයාට යුක්තිය ලබා දීම වෙනුවෙන් වෙහෙසුන නීතිඥයන්ට දිගින් දිගටම එල්ල වු තර්ජනයේ දිගුවක් ලෙසිනි.
” ශ්‍රී ලංකාවේ රාජ්‍ය ව්‍යුහය, යුක්තිය ඉල්ලා සිටින වින්දිත දෙමළ ජනතාවට, ඔවුන් වෙනුවෙන් හඩ නැගු නීතිඥයන්ට දිගින් දිගටම සිදු කළ තර්ජනය අඛණ්ඩව පවත්වාගෙන යාමේ අවස්ථාවක් තමයි මේ මහේස්ත්‍රාත්වරයාට තර්ජනය කිරීම.”
බෞද්ධ රටක්
ඔක්තෝබර් 1 වැනිදා මුල්ලිකයික්කාල්හි සංවර්ධන ව්‍යාපෘතියකට එක්වෙමින් දෙමළ ජාතික සන්ධානයේ පාර්ලිමේන්තු මන්ත්‍රී, නීතිඥ එම්.ඒ සුමන්තිරන් අවධාරණය කර තිබුනේ ජීවිත ආරක්ෂාව වෙනුවෙන් රටින් පළා යෑමට සිදුවු විනිසුරුවන් අතරින් විවෘත ප්‍රකාශයක් සිදු කර තනතුරුවලින් මහේස්ත්‍රාත්වරයකු ඉල්ලා අස්වු පළමු අවස්ථාව මෙය බවයි.
“අධිකරණයේ ස්වාධීනත්වය ප්‍රශ්න කර තිබීම අපේ රටේ ඉතිහාසයේ අලුත් ප්‍රශ්නයක් නෙමෙයි. බලපෑම් මත විනිසුරුවරුන් කීප දෙනෙකු රට හැර ගිය අවස්ථා පසුගිය කාලයේ තියනවා. රට හැර ගිය අයගෙන් විවෘතව ප්‍රකාශයක් කරලා තනතුරුවලින් ඉල්ලා අස්වුණ පළවෙනි අවස්ථාව මෙයයි.”
එම අවස්ථාවට එක්ව සිටි හිටපු පාර්ලිමේන්තු මන්ත්‍රී සී. සිවමෝහන් අවධාරණය කළේ විනිසුරුවරයාට විවේඡන එල්ල වන අවස්ථාවේ ආණ්ඩුව නිශ්ශබ්දව ඒ දෙස බලා සිටීම ලැජ්ජාවට කරුණක් බවයි.
“විනිසුරුවරයෙකු තනතුරින් නොබලා දෙමළ ජාතිකයකු ලෙස ඔහුට එල්ල කළ විවේචන දෙස සමස්ත ආණ්ඩුවම බලාගෙන සිටීම ලැජ්ජාවට පත් විය යුතු කරුණක්. මේ තත්වය තුළ තමයි අභ්‍යන්තර යාන්ත්‍රණයෙන් වින්දිතයන්ට සාධාරණයක් ඉටු වෙන බවත්, ජාත්‍යන්තර පරීක්ෂණයක් අනවශ්‍ය බවටත් සිංහල ජාතිකවාදීන් කතා කරමින් ඉන්නේ. විනිසුරුවරයෙකුට ඉල්ලා අස්වෙලා රටින් යනවා කියන තැනට පත් කිරීම මම හෙළා දකිනවා. ”
මහේස්ත්‍රාත් ටී. සරවනරාජාගේ අධිකරණ තීන්දු සරත් වීරසේකර මන්ත්‍රීවරයා තවත් වරෙක අභියෝගයට ලක් කරමින් ජුලි 7 වැනි සිකුරාදා පාර්ලිමේන්තුවේදී සදහන් කර තිබුනේ මෙය බෞද්ධ රටක් බවට මහේස්ත්‍රාත්වරයාට මතක් කර දිය යුතු බවයි.
“මේක බෞද්ධ රටක් කියන එක මේ මහේස්ත්‍රාත්වරයාට අපි මතක් කර දිය යුතුයි. නායක ස්වාමීන් වහන්සේ නමක් භික්ෂුන් වහන්සේලා සමග කුරුන්දි චෛත්‍යට මලක් පුජා කරාම ඒක පරීක්ෂණයට බාධාවක් වෙන්නේ කොහොමද කියලා මං අහන්න කැමතියි.”
හිටපු උතුරු පළාත් සභා මන්ත්‍රී තුරෙයිරාසා රවිහරන් පවසන්නේ අධිකරණයට දේශපාලනය මැදිහත්වී සිදු කළ තර්ජන විනිසුරුවරයාට රටින් යෑමට පසුබිම නිර්මාණය කළ බවයි.
“අධිකරණය ස්වාධීනව ක්‍රියාත්මක විය යුතු තත්වයක තිබිය දී ඒ අධිකරණයට දේශපාලනය මැදිහත්වෙලා ආණ්ඩුවේ පිරිස එයාට ( මහේස්ත්‍රාත්ට) ජීවිත තර්ජනය කරමින් විවිධ හිරිහැර කරලා එයාට රට හැර යෑමට පසුබිම සකස් කරලා තියනවා.”
theleader.lk
