දිනකට කෝවිඩ් ආසාදිත වන සංඛ්‍යාව දෙදහස් තුන්සීය ඉක්මවද්දී අගෝස්තු දෙවැනිදා සිට රාජ්‍ය සේවකයන් යළි සේවයට කැඳවා තිබේ.
සියලුම කාර්ය මණ්ඩල චක්‍රීය පදනම යටතේ කැඳවමින් සහ නිවසේ සිට රාජකාරි කිරීමට අදාළව නිකුත් කර ඇති සියළු චක්‍ර ලේඛ අවලංගු කරමින් රාජ්‍ය සේවකයන් සාමාන්‍ය පරිදි සේවයට කැඳවන ලෙස ජනාධිපති ලේකම් පී . බී ජයසුන්දර රාජ්‍ය සේවා, පළාත් සභා හා පළාත් පාලන අමාත්‍යංශ ලේකම් ජේ. ජේ. රත්නසිරිට දැනුම් දී ඇති බව ජනාධිපති මාධ්‍ය අංශය
පවසයි.
ජනගහනයෙන් ඉහල ප්‍රතිශතයකට කොවිඩ් මර්දන එන්නත් ලබා දී ඇති බැවින් රාජ්‍ය සේවකයන් බහුතරයක් ද එන්නත් ලබා ඇති බව පවසන ජනාධිපති මාධ්‍ය අංශය ඔවුන් නිකුත් කළ නිවේදනයක් මගින් අවධාරණය කරන්නේ සෞඛ්‍ය උපදෙස් මත රාජ්‍ය සේවය සාමාන්‍ය පරිදි පවත්වා ගෙන යාමට ප්‍රමුඛත්වය දිය යුතු බව යැයි theleader.lk වෙබ් අඩවිය වාර්තා කොට තිබේ.
මේ අතර පවතින වසංගතය පැතිර යාම පිළිබඳ අනතුරු අඟවමින් රජයේ වෛද්‍ය නිලධාරීන්ගේ සංගමය ප්‍රකාශ කළේ ඉදිරියේදී මසකට කොවිඩ් අසාධිතයන් 4000 ක් 4500ක් අතර ප්‍රමාණයක් මිය යාමේ හැකියාවක් පවතින බවය.
‘’රට විවෘත කිරීම ඉතා සැළකිල්ලෙන් කළ යුතු දෙයක්. මේ දිනවලත් කොවිඩ් ආසාදිතයන්ගෙන් සියයට පනහක් ඔක්සිජන් අවශ්‍යතාව මත යැපෙන්නේ” යනුවෙන් රජයේ වෛද්‍ය නිලධාරීන්ගේ සංගමයේ මාධ්‍ය කමිටු සභික වෛද්‍ය ප්‍රසාද් කොළඹගේ පවසයි.
‘’’ජාතික රෝහලේත් කොවිඩ් රෝගීන්ගෙන් ඇදන් ප්‍රමාණය පිරිලා. විශේෂයෙන් ළමා රෝහලේ පවතින ඇඳන් ප්‍රමාණයට වඩා ආසාදිත දරුවන් වාර්තා වෙලා. වෛද්‍ය, හෙද සහ සෙසු සහායක කාර්ය මණ්ඩල උපරිමයෙන් කටයුතු කරමින් ඉන්නවා. දිනකට මරණ 50කට ආසන්න වෙලා තිබෙනවා. මෙය භයානක තත්ත්වයක්. යුද්ධය පැවති කාලයේවත් මෙහෙම වුණේ නැහැ’’ යනුවෙන් වෛද්‍ය ප්‍රසාද් කොළඹගේ අනතුරු අඟවයි.
රාජ්‍ය සේවකයන් සේවයට කැඳවීමට ආණ්ඩුව සුදානම් වෙද්දී කෝවිඩ් වසංගත තත්වය ඉදිරියේදී දරුණු විය හැකි බවට අනතුරු අඟවමින් මහජන සෞඛ්‍ය පරීක්ෂක වරුන්ගේ සංගමයේ සභාපති උපුල් රෝහණ මාධ්‍ය වෙත කියා සිටියේ “කලින් මුහුණ දීපු රැලි දෙකටම වඩා බැරෑරුම් තත්වයක අපි දැන් ඉන්නවා. යම් විදිහකින් කලින් තිබුන තත්වයට ගියොත් 4000කටත් වැඩි මට්ටමකට යනවා කියන එක තමයි අපේ ඇස්තමේන්තුව. මේ තත්වය භයානකයි,’’ යනුවෙනි.
ඔහු වැඩිදුරටත් අවධාරණය කරන්නේ දැන් පවතිනුයේ එවන් භයානක තත්වයක ඇරඹුමක් බවය.
රට අරින තීන්දුව වෙනස් වෙයිද ?
සඳුදා රට විවෘත කරන තීරණය බොහෝ දුරට වෙනස් විය හැකියි යැයි ප්‍රාථමික සෞඛ්‍ය සහ කොරෝනා මර්දන රාජ්‍ය ඇමතිනී විශේෂඥ වෛද්‍ය සුදර්ශනී ප්‍රනාන්දුපුල්ලේ මහත්මිය පැවසු බව ලංකාදිප වෙබ් අඩවිය අද වාර්තා කර තිබේ.
දැන් රට තියෙන්නේ ඒ තීරණය ගනිද්දි තිබුණ තත්ත්වයේ නොවේ යැයි පැවසූ රාජ්‍ය ඇමතිවරිය පසුගිය සතියේදී රෝගීන් ප්‍රමාණය වැඩිවී ඇතැයිද සඳහන් කළාය.
පවතින අවදානම් තත්වය යටතේ කල්පනාකාරීව තීරණ ගැනීමට සිදුවන බව ඇය වැඩිදුරටත් කීවාය.
දින 2 ක් තුල කොළඹ ජාතික රෝහලෙන් ආසාදිතයන් 400 ක්
කොළඹ ජාතික රෝහල තුලදී 28 සහ 29 දෙදින තුළ පමණක් හඳුනාගත් කොවිඩ් ආසාදිතයන් ගණන 400කට ආසන්න බව එහි ජ්‍යෙෂ්ඨ ප්‍රකාශකයෙකු සඳහන් කරන බව ලංකාට්‍රෲත් වෙබ් අඩවිය සදහන් කරයි .
හදිසි අනතුරුවලට ලක්වී ජාතික රෝහලට රැගෙන එන පුද්ගලයින්ගෙන් සැලකිය යුතු පිරිසකටද කොවිඩ් ආසාදනය වී ඇති බවට තහවුරු වන බවද එම පුවතේ වැඩිදුරටත් වාර්තා වේ.
මෙලෙස දිනෙන් දින ඉහළ යන කොරෝනා ව්‍යාප්තිය හේතුවෙන් කොළඹ ජාතික රෝහල මේ වනවිට දැඩි අවදානමකට ලක්ව තිබේ.
නව රැල්ලේ බලපෑමෙන් කොළඹ ජාතික රෝහලේ සෞඛ්‍ය කාර්ය මණ්ඩලයේ 250කට ආසන්න පිරිසකට මේවනවිටත් කොවිඩ් – 19 වෛරසයට ගොදුරු වී ඇති අතර ඉන් වැඩි පිරිසක් හෙද නිලධාරීන් බවද වාර්තා වේ.
