(2.30PM) ශ්‍රී ලංකාවේ 14 වැනි අග්‍රාමාත්‍යවරයා ලෙස පත්වූ එක්සත් ජාතික පෙරමුණේ නායක රනිල් වික්‍රමසිංහ මහතා දිවුරුම් දීමෙන් පැය කිහිපයකට පසුව අරලියගහ මන්දිරයෙන් නික්ම වික්‍රමසිංහ පවුලට අයත් කොල්ලූපිටියේ පස්වැනි පටුමගේ පිහිටි නිවසේ පදිංචියට ගියේය.
රනිල් වික්‍රමසිංහ මහතා අගමැති ධුරයේ දිවුරුම් දීම නිමිත්තෙන් අරලියගහ මන්දිරයේ පැවති පාක්ෂික හමුව අවසන් වූ විගසම මහාචාර්ය මෛත්‍රි වික්‍රමසිංහ මහත්මිය ඊයේ (16) දහවල්ම අරලියගහ මන්දිරයෙන් පිටත්ව ගියාය.
ඔක්තෝබර් 26 වැනි දා රනිල් වික්‍රමසිංහ මහතා අග්‍රාමාත්‍යධුරයෙන් ඉවත් කිරීමෙන් පසුව මෙරට ප්‍රජාතන්ත්‍රවාදී බලවේග ඒකරාශී කිරිම සදහා රනිල් වික්‍රරමසිංහ මහතා අරලියගහ මන්දිරයේ රැඳී සිටීමට තීරණය කළ අතර මහාචාර්ය මෛත්‍රී වික්‍රමසිංහ මහත්මිය ද මුළු කාළය තුළම එහි ගත කළාය.
යහපාලනය සඳහා වූ එක්සත් ජාතික පෙරමුණු ජාතික රජය 2015 ජනවාරි 08 වැනි දා පිහිටුවීමෙන් පසුව ඔක්තෝබර් 26 වැනි දා දක්වා කාලය තුළදී රනිල් වික්‍රමසිංහ මහතා අරලියගහ මන්දිරයේ ගතකර තිබුණේ රාත්‍රීන් දෙකක් පමණි.
අග්‍රාමාත්‍යධුරයෙන් ඉවත් කිරිමෙන් පසුව පුරා දින 50ක් අරලියගහ මන්දිරයේ රැඳී සිටිමින් මෙරට ප්‍රජාතන්ත්‍රවාදී බලවේග ඒකරාශී කරන කේන්ද්‍රස්ථානය බවට අරලියගහ මන්දිරය පත්කිරිමට රනිල් වික්‍රමසිංහ මහතා පියවර ගත් බව එක්සත් ජාතික පක්ෂ මහලේකම් අකිල විරාජ් කාරියවසම් මහතා පැවසීය.
(www.lankadeepa.lk)
