එක්සත් රාජධානිය මුල් කරගත් ගෝලීය දෙමළ සංසදය (GTF) සහ බෞද්ධ භික්ෂූන් වහන්සේලා කණ්ඩායමක් අතර සිදුවූ හමුවකින් පසු නිකුත් කළ
“සියලුම ප්‍රජාවන්ගේ යහපැවැත්ම ප්‍රවර්ධනය කරන බහුත්වවාදී ශ්‍රී ලංකාවක් ඇතිකිරීම” සඳහා යැයි ප්‍රසිද්ධියට පත් කොට ඇති “හිමාලයා ප්‍රකාශනය” නම් ලියවිල්ල, ශ්‍රී ලංකාවේ දෙමළ ජනයා සහ දෙමළ ඩයස්පෝරා කණ්ඩායම් ගණනාවක් විසින් දැඩි ලෙස ප්‍රතික්ෂේප කර තිබේ.
ජනාධිපති ලේකම් කාර්යාලයේදී දෙසැම්බර් 8 දා GTF කණ්ඩායම සහ බෞද්ධ භික්ෂූන් හමුවූ ජනාධිපති රනිල් වික්‍රමසිංහ විසින් මෙම ප්‍රකාශනය උණුසුම් ලෙස පිළිගන්නා ලදී.
අවම වශයෙන් 40,000ක පමණ නිරායුද වැසියන්ගේ මරණ සහ අතුරුදහන්වීම් 20,000ක් පමණ වාර්තා කරමින් අවසන් වූ යුද්ධය මෙහෙයවූ හිටපු ජනාධිපති මහින්ද රාජපක්ෂද GTF සහ යහපත් ශ්‍රී ලංකාවක් සඳහා වූ සංඝ සංසදය නමින් නමැති බෞද්ධ භික්ෂූන් කණ්ඩායම මුණගැසුනි.
හිමාලයා ප්‍රකාශනය මල්වතු – අස්ගිරි මහනාහිමිවරුන්ටද පිළිගන්වා ඇත.
දෙමළ ඩයස්පෝරා කණ්ඩායම් හයක් විසින් දැඩි විවේචනයකින් යුතුව නිකුත් කළ මාධ්‍ය නිවේදනයක සදහන් වන්නේ “නිදහසේ සිට, දෙමළ ජනයාගේ මූලික ගැටලුවලට විසඳුම් සොයාගැනීමේ අරමුණින් දෙමළ සහ සිංහල දේශපාලන නායකයන් අතර අත්සන් කළ සෑම ගිවිසුමක්ම අවලංගු කිරීමට ප්‍රධානම හේතුව වූයේ දේශපාලන ඉතිහාසය තුළ බෞද්ධ භික්ෂූන්ගේ ආධිපත්‍යය,” බවයි.
බ්‍රිතාන්‍ය දෙමළ සංසදය (British Tamil Forum), ප්‍රංශය පදනම් කොටගත් දෙමළ ජනයාගේ රැකවරණය සඳහා වන මධ්‍යස්ථානය (Centre for Protection of Tamils based in France), අයර්ලන්ත දෙමළ ජනයාගේ සංසදය (Irish Tamils Forum), සාමය සහ යුක්තිය සඳහා වන සහයෝගිතා කණ්ඩායම – දකුණු අප්‍රිකාව (Solidarity Group for Peace and Justice-South Africa), ස්විට්සර්ලන්ත දෙමළ ක්‍රියාකාරී කණ්ඩායම (Swiss Tamil Action Group) සහ වර්ග සංහාරයට එරෙහි මුරිසියේ දෙමළ ව්‍යාපාරය (Tamil Movement against Genocide in Mauritius) සංවිධාන වෙනුවෙන් නිකුත් කළ මාධ්‍ය නිවේදනය, ශ්‍රී ලංකාවේ ගැටුම්වල ඉතිහාසයට අවධානය යොමු කර තිබේ.
“කවුරුන් බලයට පැමිණියත් ශ්‍රී ලංකා රාජ්‍යයේ අරමුණ රට ඒක-වාර්ගික, ඒක-භාෂික සහ ඒක-ආගමික සිංහල-බෞද්ධ දේශයක් බවට පත්කිරීම බව දෙමළ ජනයාට එරෙහිව දිවයින තුළ ක්‍රියාත්මක වූ ප්‍රචණ්ඩත්වයේ සහ වර්ග සංහාරවල ඓතිහාසික චක්‍ර ප්‍රබල සාක්ෂි සපයයි.”
ඔවුන් තවදුරටත් චෝදනා කරන්නේ මෙම හමුව දෙමළ ජනයා සහ ජාත්‍යන්තර ප්‍රජාව මුලා කිරීමට දේශපාලනික වශයෙන් අරමුණු කොටගත් එකක් බවත්, මෙම ‘ප්‍රකාශනය’ සම්බන්ධ සමස්ත ක්‍රියාදාමයම කිසිදු සාකච්ඡා ක්‍රියාවලියකින් තොරව රහසිගතව කරන ලද්දක් බවත් ය.
“‘හිමාලයා ප්‍රකාශනය’ වැනි ප්‍රකාශනයක් වින්දිතයන් සමග සාකච්ඡා කිරීම සහ රැස්වීමට ප්‍රථම මහජනයා හමුවට ඉදිරිපත් කිරීම ඉතාමත් වැදගත් අවශ්‍යතාවකි. එසේ සිදුවූයේ නැත,” යි එම ප්‍රකාශනයේ වැඩිදුරටත් සදහන්ය.
යුද්ධයෙන් පසුව පත්වූ ආණ්ඩු සමග GTF මීට කලින් දියත්කළ මෙවැනිම ක්‍රියාමාර්ග බරපතල ලෙස අසාර්ථක විය.
මෙම නවතම ප්‍රයත්නය “හිමාල දර්ශන විහරණය සඳහා කදිම වූ ස්ථානයක්” ලෙස හැඳින්වෙන නාගර්කොට්හි අප්‍රේල් මාසයේ පවත්වන ලද රහසිගත හමුවීම්වල ප්‍රතිඵලයකි.
දේශීය දෙමළ ජනයා සහ ඔවුන්ගේ නියෝජිතයන් වෙනුවට GTF නේපාලයේදී බෞද්ධ භික්ෂූන් සමග සාකච්ඡා පැවැත්වීම දෙමළ දේශපාලන පක්ෂ විසින් විවේචනය කර තිබේ.
දෙමළ ජාතික ජනතා පෙරමුණේ නායක ගජේන්ද්‍රකුමාර් පොන්නම්බලම් ලංකාවේ හමුවීම සඳහා GTFහි ප්‍රකාශක සුරේන් සුරේන්දිරන් විසින් හමුවකට කළ ආරාධනය ප්‍රතික්ෂේප කර ඇත.
පාර්ලිමේන්තු මන්ත්‍රී පොන්නම්බලම්ගේ ප්‍රතිචාරය සමාජ මාධ්‍යයේ පළවී තිබුණේ මෙසේය.
“සුරේන්, ඔබ සමග හෝ ඔබගේ කණ්ඩායමේ අනෙකුත් අය සමග කතාකිරීමට කිසිවක් නැත. මෙම රජය යුද්ධයේ අවසානයෙන් පසු පත්වූ දැඩි මර්දනකාරී රජයක්, එසේත් නැත්නම් වඩාත්ම මර්දනකාරී රජය ලෙස හැඳින්විය හැකිය. සති දෙකකට කලින් මහවිරු සතියේදී ජනයාට එරෙහිව ත්‍රස්තවාදය වැළක්වීමේ පනත භාවිත කළ මෙම රජය, අත්අඩංගුවට ගැනීම් දිගටම සිදු කරයි. මෙම රජය සමග කටයුතු කිරීම මගින් ඔබ ඊට සුදුහුණු ගෑමට තීරණය කොට ඇත්තේ විශේෂයෙන්ම ඊට එරෙහිව දැඩි පීඩනයක් එල්ල කළ යුතු අවස්ථාවකයි. එයද කර ඇත්තේ මව්බිමේ එක් සංවිධානයක් සමග හෝ සාකච්ඡා කිරීමකින් තොරවයි. වසර ගණනාවක් පුරා ඔබගේ කණ්ඩායම දෙමළ ජනයාගේ අපේක්ෂා සහ අවශ්‍යතා දුර්වල කිරීමට නොයෙකුත් දේ කර ඇත. ඔබගේ මෑත හැසිරීම පෙන්වන්නේ කිසිවක් වෙනස් වී නොමැති බවයි.”
විදේශගත දෙමළ සංවිධාන හය තවදුරටත් පවසන්නේ, දෙමළ ඩයස්පෝරා සංවිධාන සමග සාකච්ඡා සාර්ථක වූවා යැයි කියමින් දෙමළ ජනතාවගේ ඉල්ලීම් මගහැරීම සඳහා ජාත්‍යන්තර ප්‍රජාව මුලාකිරීමට GTF සහභාගි වූ හමුව ජනාධිපති රනිල් වික්‍රමසිංහට අවස්ථාවක් පාදා දෙනු ඇති බවත්, අභ්‍යන්තර විසඳුමක් සඳහා යෝජිත සත්‍ය සහ සංහිඳියා කොමිසමට ඇති සහාය ප්‍රවර්ධනය කරනු ඇති බවත්ය.
එවැනිම ප්‍රකාශයක් නිකුත් කරමින් තවත් දෙමළ ඩයස්පෝරා සංවිධාන හයක් පවන්නේ, GTF යනු විශ්වසනීයත්වයෙන් සහ වැදගත්කමින් තොර සංවිධානයක් බවයි.
ඕස්ට්‍රේලියානු දෙමළ කොන්ග්‍රසය (Australian Tamil Congress), උතුරු ඇමරිකානු දෙමළ සංගම් සංසදය (Federation of Tamil Sangams of North America [FeTNA]), ඇමරිකා එක්සත් ජනපදයේ ඉලංගෙයි දෙමළ සංගමය (Ilankai Tamil Sangam USA), දෙමළ ඇමරිකානුවන්ගේ එක්සත් දේශපාලන ක්‍රියාකාරී කමිටුව (Tamil Americans United PAC), එක්සත් ජනපදයේ දෙමළ ක්‍රියාකාරී කණ්ඩායම (United States Tamil Action Group) සහ ඇමරිකා එක්සත් ජනපදයේ ලෝක දෙමළ සංවිධානය (The World Thamil Organization USA) යන සංවිධාන විසින් අත්සන් කර ඇති මෙම ප්‍රකාශය තවදුරටත් සඳහන් කරන්නේ GTF සිය ප්‍රජාව නියෝජනය නොකරන බවයි.
“2009 සැප්තැම්බර් මස ප්‍රංශයේ පැරිස් නුවරදී පිහිටුවීමෙන් පසුව, යුරෝපය මුල් කරගත් සංවිධාන 10ක් ඇතුළුව GTFහි ආරම්භක සාමාජික රටවල්/ දෙමළ සංවිධාන 14න් බහුතරයක් ඉන් වෙන්වී සිටී. තවද, බ්‍රිතාන්‍ය දෙමළ සංසදය, ඕස්ට්‍රේලියානු දෙමළ කොන්ග්‍රසය සහ එක්සත් ජනපදයේ දෙමළ ක්‍රියාකාරී කණ්ඩායම GTF වෙතින් ඉවත්වී ඇත. මේ හේතුවෙන්, මෙම හවුලේ ප්‍රතිඵලවලට දෙමළ ඩයස්පෝරාවේ බහුතරයකගේ සහයෝගය නොලැබෙන අතර, එනිසා ඊට ඇත්තේ සීමාසහිත විශ්වසනීයත්වයක් සහ වැදගත්කමකි.”
මහින්ද රාජපක්ෂ ජනාධිපති පදවිය දැරූ 2014 වසරේදී GTF තහනම් කරන ලදී. නමුත්, ඔහු මෛත්‍රීපාල සිරිසේනට 2015 ඡන්දයේදී පරාජය වීමෙන් පසු, නව ජනාධිපතිවරයා විසින් එම තහනම ඉවත් කරන ලදී.
මෑතකදී නෙරපනු ලැබූ ගෝඨාභය රාජපක්ෂ ජනාධිපති ලෙස පත්වීමත් සමග එම තහනම නැවත පනවනු ලැබූ නමුත්, වර්තමාන ජනාධිපති රනිල් වික්‍රමසිංහ 2022 අගෝස්තුවේදී එම තහනම නැවතත් ඉවත් කරනු ලැබුවේ එම සංවිධානය “තවදුරටත් ත්‍රස්තවාදී ක්‍රියාකාරකම්වලට අරමුදල් ලබා නොදෙන බව” සොයාගෙන ඇති බව පවසමින්.
ඒකාබද්ධ හිමාලයා ප්‍රකාශනය බාරදීම ජනාධිපති මාධ්‍ය අංශය විසින් හඳුන්වන ලද්දේ “සමගි සම්පන්න සහ සියල්ලන්ම ඇතුලත් කරගත් ශ්‍රී ලංකාවක් සඳහා සංවාදයක් සහ සහයෝගීතාව ඇතිකිරීම කෙරෙහි තැබූ වැදගත් ඉදිරි පියවරක්” බවයි.
