ජනාධිපතිවරයා පසුගිය පළාත් පාලන මැතිවරණ වේදිකාව පාවිච්චි කළේ රනිල් හොරා කියන්නය. අගමැති තනතුර වෙනස් කරන්නත් මහ මෙහෙයුමක් දියත් කළේය. තමුන් මේ හොරු අල්ලා අවීචි මහනරකාදියට යවා මිසක් තනතුරෙන් යන්නේ නැති බවද කීවේය.
එහෙත් දැන් අගමැති රනිල් තමන්ගේ බලය තවදුරටත් වර්ධනය කර ගනිමින් නීතිය හා සාමය ඇමැතිකමද ලබා ගෙන තිබේ.
මේ ජනාධිපතිවරයා ලැබූ පරාජයක්ද නැතිනම් ජනතාවට විහිළු සැපයීම තවදුරටත් ජනාධිපතිවරයා සිදුකරමින් සිටිනවාද යන්න පැහැදිලි නැත.එසේත් නැත්නම් තමන්ගේ බැරි බැරියාව වසාගෙන , හොරු ඇල්ලීමේ වගකීමේන් තමන්ට මිදෙන්නට හැකි උපක්‍රමයක් ලෙස නීතිය හා සාමය රනිල්ටම දුන්නා වෙන්න බැරි නැත.
ඒ කෙසේ නමුත් අගමැතිවරයා පවරාගෙන ඇත්තේ අතිශය වගකීම් සහගත විෂයකි. ඔහුට තවදුරටත් මේ සම්බන්ධයෙන් විහිළු සැපයිය නොහැක. රාජපක්ෂවරුන්ව ආරක්ෂා කරමින් සිටින බවට ජනාධිපතිවරයාගේ පාර්ශ්වය විසින් නඟන චෝදනාවට දැන් ඔහු භාවිතාවෙන් පිළිතුරු සැපයිය යුතුය.
දේශපාලනික වශයෙන් ගත් කළ පසුගිය කාලයේ රනිල්ට අවශ්‍ය වූයේ ශ්‍රීලනිපය දෙකට කඩා දැමීමට රාජපක්ෂවරුන්ගේ ඇති උත්සාහයට උල්පන්දම් දීමය. දැන් ඒ කාරිය අවසන්ය. දැන් ඔහු හමුවේ වන අභියෝගය වන්නෙ පොහොට්‍ටුව කැබලි කිරීමය. ඒ සඳහා රාජපක්ෂවරුන් කූඩු කිරීම විය යුතුය. එසේ නොවුණහොත් එය එජාපයේ මෙන්ම ශ්‍රීලනීපයෙත් අවසානය වනු ඇත.
ප්‍රභූ පැලැන්තිය ආරක්ෂා කිරීම රනිල්ලාගේ පැලැන්තියේ සාම්ප්‍රදායික වුවමනාව මත්තේ තවදුරටත් රනිල් සිටියහොත් ඔහු අපේක්ෂා කරන ලිබරල් ප්‍රජාතන්ත්‍රවාදී වෙනස මේ රටේ සිදුකළ හැකි නොවනු ඇත. රට ජාතිවාදයෙන් යට වී යළි ගෝත්‍රික පන්නයේ පාලනයක් සහිත යුගයක්ම උදාවනු ඇත.
www;lankadaily.com
