ජීවිත ආරක්ෂාව පතා ධුරයෙන් ඉල්ලා අස්වී රටින් පලා යෑමට සිදුවු මුලතිව් මහේස්ත්‍රාත්වරයාට
යුක්තිය ඉටු කරන ලෙස බලකරමින් වන්නියේ තරුණයන් පිරිසක් නිහඩ විරෝධයක් දියත් කර තිබේ.
විනිසුරුවරයාට ඉල්ලා අස්වීමට සිදුවීමට විරෝධය පළකරමින් වන්නියේ නීතිඥ ප්‍රජාව කළු මුඛවාඩම් බැඳ උසාවි ගිය අතර දෙමළ දේශපාලන පක්ෂ ඒකාබද්ධවී ලබන 20 වැනිදාට ඒකාබද්ධ හර්තාලයක් ප්‍රකාශයට පත් කර ඇත.
ඔක්තෝබර් 09 වැනි සදුදා පෙරවරුවේ මුලතිව් දිස්ත්‍රික් ලේකම් කාර්යාලය ඉදිරිපිටදී සටන් පුවරු ප්‍රදර්ශනය කරමින් විරෝධතාවය දියත් කළ තරුණ තරුණියන් සිය ඉල්ලීම වගකිවයුතු බලධාරීන් වෙත යොමු කිරීම සදහා මුලතිව් දිස්ත්‍රික් අතිරේක ලේකම් කේ. කනගේෂ්වරන් වෙත සන්දේශයක්ද බාර දුන් බවයි පළාත් බද වාර්තාකරුවන් පවසන්නේ.
සන්දේශයේ ඇතුලත් කරුණු මුලතිව් දිස්ත්‍රික්කයේ තරුණයන් වෙනුවෙන් නේසරාසා සංගීසන් මාධ්‍යවේදීන් හමුවේ ඉදිරිපත් කර තිබුනි.
එහි සදහන්ව ඇත්තේ මුලතිව් දිසා සහ මහේස්ත්‍රාත් විනිසුරු ටී. සරවණරාජා නීතිය අකුරට ඉටු කළ අයෙක් බවයි.
“දිස්ත්‍රික් විනිසුරු ටී. සරවනරාජාට කළ තර්ජනය නිසා ඔහුට රටින් පිටවී යෑමට සිදු උනා. විනිසුරුවරයා පුද්ගලිකව මුලතිව් දිස්ත්‍රික්කය වෙනුවෙන් අවධානය යොමු කරලා ස්වෙච්ඡාවෙන් කිසිම තහනම් නියෝගයක් නිකුත් කරලා නෑ. නීතියේ මොනවද තියෙන්නේ? ඒ විදිහට තමයි ඔහු ක්‍රියාත්මක උනේ.”
ඒ සම්බන්ධයෙන් නිසි විමර්ශනයක් කරන ලෙස මුලතිව් තරුණයෝ අධිකරණ අමාත්‍යවරයාගෙන්ද ඉල්ලා සිටියහ.
” ඒ වගේ කෙනෙක් තමයි තමන්ගේ තනතුරින් ඉල්ලා අස්වෙලා තියෙන්නේ. මේ ගැන හරියට විමර්ශනයක් කරන්න කියලා ඉල්ලීම් කරලා දිස්ත්‍රික් ලේකම් හරහා අධිකරණ ඇමතිගෙන් සහ ලේකම්ගෙන් මුලතිව් දිස්ත්‍රික්කයේ තරුණයෝ විදිහට අපි ඉල්ලීම් කරනවා.”
හින්දුන් මෙන්ම බෞද්ධයන් ද අයිතිය කියා පාන කුරුන්තුර්මලේ පුරා විද්‍යා භුමියේ අධිකරණ නියෝග නොකතා කුරුන්දි විහාරය ඉදිකිරීම සම්බන්ධයෙන් වන නඩුව විභාග කළ මුලතිව් දිසා සහ මහේස්ත්‍රාත් විනිසුරු ටී. සරවණරාජා අධිකරණ සේවා කොමිෂන් සභාවේ ලේකම් වෙත සිය ඉල්ලා අස්වීමේ ලිපිය යොමු කරමින් පසුගියදා දැනුම් දී තිබුනේ තමන්ට එල්ල වී ඇති ජීවිත තර්ජනය හේතුවෙන් අධිකරණ විනිසුරු තනතුරින් ඉල්ලා අස්වන බවයි.
නියෝග ආපසු හැරවීම
කුරුන්තුර්මලේ පුරාවිද්‍යා භුමියේ ඉදිකර ඇති කුරුන්දි විහාරයේ වැඩ අත්හිටුවමින් දී ඇති නියෝග ආපසු හරවන ලෙස නීතිපති දෙපාර්තමේන්තුව විනිසුරු වරයාට බලපෑම් කළ බව දෙමළ ජනමාධ්‍ය වාර්තා කර තිබේ.
කොළඹින් පලකෙරෙන ජනමාධ්‍ය පවසන්නේ විනිසුරුවරයා වගඋත්තරකරුවකු ලෙස නම් කරමින් ඔහු දුන් තීන්දු අවලංගු කරන නියෝග ඉල්ලා ගොනු කොට ඇති පෙත්සම් තුනක් සම්බන්ධයෙන් ඔහු වෙනුවෙන් පෙනී සිටීමට කරන ලද ඉල්ලීමක් අනුව නීතිපති කාර්යාලයේ සාකච්ඡාවක් පැවති නමුත් බලපෑමක් නොකෙරුණු බවයි.
මුලතිව් විනිසුරුවරයා විදේශගතව සිටින බව නීතිපති දෙපාර්තමේන්තුව උපුටා දක්වන අගනුවර ජනමාධ්‍ය පවසයි.
මහේස්ත්‍රාත් ටී. සරවනරාජාගේ ඉල්ලා අස්වීම සම්බන්ධයෙන් පූර්ණ පරීක්ෂණයක් සිදු කරන ලෙස ජනාධිපති රනිල් වික්‍රමසිංහ විසින් ජනාධිපති ලේකම් සමන් ඒකනායක වෙත උපදෙස් ලබා දී ඇති බව ජනමාධ්‍ය වාර්තා කර තිබේ.
පූර්ණ විමර්ශනයක් කරන ලෙස අපරාධ පරීක්ෂණ දෙපාර්තමේන්තුවට (CID) නියෝග කර ඇතැයි මහජන ආරක්ෂක අමාත්‍ය ටිරාන් අලස් පවසයි
සබැඳි පුවත් :
