පසුගියදා අඟුලාන මුහුදු ප්රදේශයේදී අනතුරට ලක්වූ ශ්රී ලංකා නාවික හමුදාවට අයත් වේග ප්රහාරක මුර යාත්රාවේ (ඩෝරා යාත්රාවක්) සිටි නාවික හමුදා නිලධාරීන් 11 දෙනෙකුගේ ජීවිත බේරාගැනීම සඳහා තම ජීවිතවල අවදානමද නොතකා ක්රියාකළ අඟුලාන ප්රදේශයේ සිවිල් පුරවැසියන් සහ ධීවර ප්රජාව විශේෂ ඇගයමකට ලක් කර තිබේ.
මෙම ප්රශංසාත්මක ලිපි සහ උපහාර ප්රදානය කිරීම නාවික හමුදාධිපති වයිස් අද්මිරාල් ඩේමියන් ප්රනාන්දු මහතාගේ ප්රධානත්වයෙන් බටහිර නාවික විධාන මූලස්ථානයේදී උත්සවකාරයෙන් සිදු කෙරිණි.
සිදුවීමේ පසුබිම
ශ්රී ලංකා නාවික හමුදාවට අයත් වේග ප්රහාරක මුර යාත්රාවක් පසුගිය අගෝස්තු 15 වැනි දින දහවල් කාලයේදී මුර සංචාරයක් නිමවා කොළඹ දෙසට පැමිණෙමින් තිබියදී අඟුලාන මුහුදු තීරයේදී හදිසි ආපදාවකට ලක්විය.
එම අවස්ථාවේදී ප්රදේශයේ පැවති රළු මුහුදු තත්ත්වය සහ දැඩි අවදානම් සහගත වාතාවරණය නොතකා, වහාම ක්රියාත්මක වූ අඟුලාන පොලිසියේද සහාය ඇතිව ප්රදේශයේ ධීවර ප්රජාව ඇතුළු සිවිල් වැසියන් පිරිසක් නාවිකයන් මුදාගැනීමේ මෙහෙයුමට ක්ෂණිකව දායක වූහ. එම කාලෝචිත මානුෂීය මැදිහත්වීම නිසා නාවික හමුදා පිරිස් නිරුපද්රිතව ගොඩබිමට ගෙන ඒමට හැකි විය.
මෙම අවදානම් සහගත අවස්ථාවේදී පුරවැසියන් ඉටු කළ උතුම් මානුෂීය මෙහෙයුම සහ ජාතික යුතුකම අගයමින්, නාවික හමුදාධිපතිවරයා අදාළ සිවිල් වැසියන් වෙත සිය හෘදයාංගම ස්තූතිය පුද කළේය.
“මෙම පුරවැසියන් තම ජීවිත අවදානම පවා අමතක කර සිදු කළ සුවිශේෂී මැදිහත්වීම සහ උදාර මානුෂීය ක්රියාව, සමස්ත ශ්රී ලාංකීය ජනතාවට මෙන්ම ආරක්ෂක අංශ වෙත දැඩි ධෛර්යයකි,” යනුවෙන් නාවික හමුදාධිපතිවරයා මෙහිදී අවධාරණය කළේය.
මෙම අනතුරින් බේරාගත් නාවික හමුදා සාමාජිකයන් 11 දෙනා රෝහල්ගත කර ප්රතිකාර ලැබූ අතර, ඔවුන්ගේ සෞඛ්ය තත්ත්වය මේ වන විට ස්ථාවර මට්ටමක පවතියි. කෙසේ වෙතත්, අනතුරින් අතුරුදන් වූ සෙසු නාවික නිලධාරියා සෙවීම සඳහා නාවික හමුදාව සහ ගුවන් හමුදාව එක්ව අඛණ්ඩ සෝදිසි මෙහෙයුම් ක්රියාත්මක කරමින් සිටින අතර, සිද්ධිය පිළිබඳව මූලික විමර්ශනයක් සිදු කිරීම සඳහා විශේෂ පරීක්ෂණ මණ්ඩලයක්ද පත් කර ඇත.
මෙම අවස්ථාව සඳහා බටහිර නාවික විධානයේ ආඥාපති රියර් අද්මිරාල් ජගත් කුමාර ඇතුළු ජ්යෙෂ්ඨ නාවික නිලධාරීන් පිරිසක්ද එක්ව සිටියහ.
