ශ්‍රී ලංකා යුද හමුදාව දෙමළ ඊළම් විමුක්ති කොටි සංවිධානය හමුවේ යුද බිමේ ලද දැවැන්තම පරාජයක් සේ ගැනෙන අලිමංකඩ ප්‍රහාරය පදනම්
කොටගෙන ලියැවුණු නවකතාවක් එළිදැක්වීමේ උත්සවයක් සංවිධානය කළ දෙමළ කලා සාහිත්‍ය සංසදයේ සභාපතිවරයාගෙන් ත්‍රස්ත මර්දන හා විමර්ශන කොට්ඨාශය (CTID) ප්‍රශ්න කර තිබේ.
ත්‍රස්ත මර්දන හා විමර්ශන කොට්ඨාශය (CTID) යේ කිලිනොච්චි, පරන්තන් ඒකකයට අප්‍රේල් 11 වැනිදා කැදවා මාධ්‍යවේදී හා ලේඛක ප්‍රදීපන් දීපචෙල්වන්ගෙන් පැය දෙකහමාරකට අධික කාලයක් ප්‍රශ්න කරමින් එම ඒකකය විමර්ශනය කර ඇත්තේ කොටි සංවිධානය සිදු කළ ප්‍රහාරයක් පාදක කරගනිමින් නවකතාවක් ලිවීම තුළ කොටි සංවිධානය නැවත නිර්මාණය කිරීමේ අදහසක් එහි පවතීද යන්නයි.
ජී ජී සරත් ආනන්ද විසින් ස්මාරක ශිලාවත යනුවෙන් සිංහලට නගන ලද යුද්ධාවසානයෙන් පසුව උතුරේ ලියැවුණු පළමු නවකතාව සේ සැලකෙන නඩුගල් (நடுகல்) කෘතියේ කතුවරයා ලෙසින් දීපචෙල්වන් මහත් පාඨක, විචාරක අවධානය දිනාගත්තෙකි.
ජ්‍යෙෂ්ඨ දෙමළ ලේඛක නා.යෝගේන්ද්‍රන් විසින් රචිත ‘34 නාට්කලිල් නීන්දික්කඩන්ද නෙරුප්පාරු (34 දිනක් තුල අග්නි ගංගා තරණය)’ නව කතාව එළිදැක්වීමේ උත්සවය පසුගිය පෙබරවාරි 10 වැනිදා කිලිනොච්චියේ දී සිදු කර තිබේ.
පළාත් බද වාර්තාකරුවන් පවසන පරිදි අලිමංකඩ ප්‍රදේශයේ ශ්‍රී ලංකා යුද හමුදාව යටතේ තිබු භුමියක්, අත්පත්කරගැනීම වෙනුවෙන් 24 වසරකට ඉහතදී කොටි සංවිධානය විසින් දින 34 ක් තිස්සේ දියත් කළ ප්‍රහාර පිලිබද තොරතුරු එම කෘතියට ඇතුලත්ව ඇත.
නවකතාව ජනගත කිරීමේ උත්සවය දෙමළ කලා සාහිත්‍ය සංසදය විසින් සංවිධානය කර ඇති අතර ත්‍රස්ත මර්දන හා විමර්ශන කොට්ඨාශයේ ප්‍රශ්න කිරීම් හමුවේ එම සාහිත්‍ය සංසදයේ සභාපතිවරයා වන ප්‍රදීපන් දීපචෙල්වන් සදහන් කර ඇත්තේ ප්‍රවීණ ලේඛක නා. යෝගේන්ද්‍රන්ට ගෞරවයක් ලෙස එම උත්සවය සංවිධානය කරන ලද බවයි.
“දෙමළ ඊළම් විමුක්ති කොටි සංවිධානයේ ප්‍රහාරය ගැන පොතක් ලිවීම තුළ කොටි සංවිධානය නැවත නිර්මාණය කිරීමේ අදහසක් එහි තිබෙනවාද? කියලා පරීක්ෂණයක් සිදු උනා. නමුත් එය එසේ නොවන බවත් එය අතීත යුද්ධයක වාර්තාවක් බවත් මම පැහැදිලි කළා. ඔබ මේ පොත එළිදැක්වීමේ උත්සවය කරලා දුන්නේ ඇයි කියලා ඇහුවා. අපි එහෙම කළේ ශ්‍රේෂ්ඨ ලේඛකයකුට ඔහුගේ අවසාන කාලයේ ගෞරවයක් දෙන්න ඕනෑ නිසා මේක කරලා දුන්නා කියලා මම කිව්වා. ”
පොත එළිදැක්වීමේ උත්සවයේ කථිකයන් සම්බන්ධයෙන්ද විමර්ශනයක් සිදු කිරීමට නියමිත බවට ත්‍රස්ත මර්දන හා විමර්ශන කොට්ඨාශය තමන් සමග පැවසු බව පළාත් බද වාර්තාකරුවන්ට දැනුම් දී ඇති ප්‍රදීපන් දීපචෙල්වන් තව දුරටත් සදහන් කර ඇත්තේ තමන්ගේ සාහිත්‍ය කටයුතු සම්බන්ධයෙන්ද ත්‍රස්ත මර්දන හා විමර්ශන කොට්ඨාශය කරුණු විමසු බවයි.
“ඔයා පොත් කීයක් ලියා තියෙනවද කියල ඇහුවා. මම ඒ සම්බන්ධයෙන් විස්තර කිව්වා. ඒවායේ එල්.ටී.ටී.ඊ සංවිධානය පිළිබඳ තොරතුරු තියනවාද කියලා ඔවුන් ඇහුවා. මම යුද්ධය ගැන, මිනිසුන්ට ඒ වෙලාවේ මුහුණදුන් බලපෑම් ගැන ලියලා තියනවා කියලා කිව්වා. මේ උත්සවයේ කථිකයන් ගැන පරීක්ෂණයක් කරන්න යනවා කියලත් ඔවුන් කිව්වා.”
නා.යෝගේන්ද්‍රන් ගේ ‘34 නාට්කලිල් නීන්දික්කඩන්ද නෙරුප්පාරු’ කෘතිය එළිදැක්වීමේ දේශන පවත්වන ලද්දේ යාපනය දිස්ත්‍රික් පාර්ලිමේන්තු මන්ත්‍රී ශිවඥානම් ශ්‍රී ධරන් සහ කරච්චි ප්‍රාදේශිය සභාවේ හිටපු සභාපති අරුනාචලම් වේලමාලිගිදන්, කරච්චි ප්‍රාදේශිය සභාවේ හිටපු මන්ත්‍රී අරුනාචලම් සත්‍යානන්දන්, කිලිනොච්චි දිස්ත්‍රික්කයේ සැලසුම් අධ්යක්ෂ එස්. මෝහනබවන් සහ ඔට්ටුසුඩාන් මහා විද්‍යාලයේ විදුහල්පති නාගේන්ද්‍රරාජා විසිනි.
theleader.lk
