එම මහේස්ත්‍රාත් අධිකරණයෙහි නඩු විභාගය අවසන් වී එහි වාර්තාව ලැබෙන තෙක් අභියාචනාධිකරණය හමුවෙහි ඇති හබයාස් කෝපුස් පෙත්සම බහා තැබීමට නියම කෙළේය. අභියාචනාධිකරණ සභාපති විනිසුරු විජිත් මලල්ගොඩ මහතා සහ අභියාචනාධිකරණ විනිසුරු එස්. තුරෙයිරාජා මහතා හමුවෙහි මේ පෙත්සම කැඳවන ලදී.
ඊයේ (23) මේ පෙත්සම කැඳවන ලද අවස්ථාවේදී මේ පෙත්සමට පසුව එකතු කරන ලද වගඋත්තරකරුවන් වූ යුද හමුදාපතිවරයා සහ යුද හමුදා බුද්ධි අංශ අධ්‍යක්ෂවරයා මේ නඩු විභාගයෙන් ඉවත් කරන ලෙස ඔවුන් වෙනුවෙන් පෙනී සිටි නීතිඥවරයා අධිකරණයෙන් ඉල්ලා සිටියේය. හබයාස් කෝපුස් පෙත්සම සහ අපරාධ පරීක්ෂණ දෙපාර්තමේන්තුව විසින් සිදු කරන පරීක්ෂණ මත පැවැත්වෙන නඩු විභාගයෙහි ඇත්තේ එකම කරුණු ද යන්න තීරණය කිරීමේ අභිමතානුසාරි බලය හෝමාගම මහේස්ත්‍රාත්වරයා සතු වන බව එහිදී සඳහන් විය. කරුණු සලකා බැලූ අධිකරණය එම නඩු විභාගයන් දිගටම හෝමාගම මහේස්ත්‍රාත් අධිකරණයෙහි පවත්වාගෙන යා හැකි පරිදි අතුරු තහනම් නියෝග ඉවත් කෙළේය.
නීතිඥ ක්‍රිෂ්මාල් වර්ණසූරිය මහතා එක්නැලිගොඩ මහත්මිය වෙනුවෙන් පෙනී සිටියේය.
නෙල්කා මැදගෙදර / දිනමිණ
