ශ්රී ලාංකීය සුභාවිත ගීත ක්ෂේත්රයේ අතීත මතකයන් අවදි කරන විට මල්ලිකා කහවිට නාමය අමතක කළ නොහැකිය. ගුවන්විදුලිය හරහා රසික හදවත් වෙත සමීප වූ ඇය, පසුව චිත්රපට පසුබිම් ගායනය තුළින්ද සිය අනන්යතාව සනිටුහන් කළ ප්රවීණ ගායිකාවකි. ඇගේ හඬ තුළ තිබූ මිහිරි බවත්, පැහැදිලි උච්චාරණයත්, ගීතයේ හැඟීම රසිකයා වෙත ගෙන යාමේ හැකියාවත් ඇයගේ ගායන දිවියට විශේෂත්වයක් එක් කළේය.
මල්ලිකා කහවිට මහත්මියගේ ගායන හැකියාව කුඩා වියේදීම හඳුනාගත හැකි විය. වයස අවුරුදු නවයේදී ළමා පිටිය හරහා ගුවන්විදුලි ගීත ලෝකයට පිවිසි ඇය, එතැන් සිට ක්රමයෙන් ප්රවීණ ගායිකාවක ලෙස සිය නම ගොඩනඟා ගත්තාය. එදා ගුවන්විදුලිය ශ්රී ලංකාවේ සංගීත රසිකයන්ගේ ප්රධානතම සංගීත මාධ්යය වූ යුගයක, ඇගේ ගීත රසිකයන් අතරට ගියේ ඒ හඬේ තිබූ සරල, සුන්දර හා හෘදයාංගම ගුණය නිසාය.
අමරණීය ගීත රැසකට හිමිකම් කියන හඬක්
මල්ලිකා කහවිටගේ ගායන ජීවිතයේ විශේෂත්වයක් වන්නේ ඇය තනි ගීත පමණක් නොව, එදා සිටි ප්රවීණ ගායකයන් සමඟ ගැයූ යුග ගීත රැසක්ද රසිකයන්ට දායාද කිරීමයි.
“චන්දන ඇඟ ගාලා කොණ්ඩෙ කඩාදාලා” ගීතය ඇගේ ජනප්රියත්වය තවත් ඉහළ නැංවූ ගීතයකි. නාරද දිසාසේකර මහතා සමඟ ගැයූ එම ගීතය අදටත් පැරණි සිංහල ගීත රසිකයන්ගේ මතකයේ රැඳී තිබේ.
ආචාර්ය ඩබ්ලිව්. ඩී. අමරදේවයන්ගේ සංගීත නිර්මාණයකට මල්ලිකා කහවිටගේ හඬ එක්වීමද ඇගේ කලා දිවියේ වැදගත් සලකුණකි. “සෙනෙහස සොම්නස අතිනත ගත්විට” ගීතය ‘ලා දළු’ චිත්රපටය වෙනුවෙන් ගැයූ අතර, එය ඇගේ පසුබිම් ගායන දායකත්වයේ සුවිශේෂී අවස්ථාවක් ලෙස සැලකිය හැකිය.
එමෙන්ම “සඳුන් ගසේ සමන් වැලක්” ගීතය ආචාර්ය අමරදේවයන් සමඟ ඇය ගැයූ තවත් මතකයේ රැඳෙන ගීතයකි. අමරදේවයන් වැනි සංගීතයේ දැවැන්තයකු සමඟ ඇගේ හඬ මුසුවීම මල්ලිකා කහවිටගේ ගායන හැකියාව පිළිබඳවම කියාපාන සාක්ෂියකි.
සිනමාවට එක් වූ මධුර හඬ
මල්ලිකා කහවිටගේ කලා දිවියේ තවත් වැදගත් පරිච්ඡේදයක් වන්නේ චිත්රපට පසුබිම් ගායනයයි. සිංහල සිනමාවේ ස්වර්ණමය යුගයේ නිර්මාණය වූ චිත්රපට ගීත අතරට ඇගේ හඬද එක්විය.
‘යටගිය දවස’ චිත්රපටය වෙනුවෙන් ගැයූ “විනෝද වෙන්න විනෝද වෙන්න” ගීතයද ඒ අතරින් කැපී පෙනෙයි. එදා චිත්රපට ගීත රසිකයන් අතර ජනප්රිය වූ එවැනි ගීත අද වන විට පැරණි සිංහල සිනමාවේ සුන්දර මතකයන් බවට පත්ව ඇත.
“කෝ අද මැණිකා කොහෙද ගියේ” ගීතයෙන් සුසිල් ප්රේමරත්න මහතා සමඟද, “සැන්ඳෑවේ මං බලා හිටියා” ගීතයෙන් එච්. ආර්. ජෝතිපාල මහතා සමඟද ඇය ගායනයෙන් එක්වූවාය. මේ ගීත හරහා එකල ජනප්රිය වූ පිරිමි ගායක හඬවල් සමඟ මල්ලිකා කහවිටගේ හඬ අපූරුවට මුසුවී තිබේ.
දේවානන්ද වෛද්යසේකර මහතා සමඟ ගැයූ “මොකද මැණිකෙ කොහෙද යන්නේ” සහ ඒ. මිල්ටන් පෙරේරා මහතා සමඟ ගැයූ “ලියක මහිම පෙති ගෝමර” වැනි ගීතද ඇගේ ගායන මතකයන් අතර වැදගත් ස්ථානයක් ගනී.
“හිනැහේවී බෝනික්කා” සිට රසික මතකයන් දක්වා
මල්ලිකා කහවිටගේ ගීත අතරින් විශේෂයෙන්ම සඳහන් කළ යුතු ගීතයක් වන්නේ “හිනැහේවී බෝනික්කා ඇස් නටවා” යන්නයි. ළමා ගීතයක් ලෙස රසිකයන් අතර අතිශය ජනප්රිය වූ මෙම ගීතය ඇගේ හඬ සමඟ බැඳුණු සුන්දර මතකයක් බවට පත්ව ඇත.
ඇගේ ගීතවල ඇති විශේෂත්වය වන්නේ ඒවා එකම ආකාරයකට සීමා නොවීමයි. ළමා ගීතයක ඇති සරල සතුටේ සිට ආදරණීය යුග ගීයක හැඟීම් දක්වා විවිධ ගීත ස්වභාවයන්ට ගැළපෙන අයුරින් සිය හඬ හැසිරවීමට ඇයට හැකි විය.
ගුවන්විදුලි යුගයේ රසික ආදරය
අද මෙන් සංගීතය ඕනෑම වේලාවක ජංගම දුරකථනයකින් හෝ අන්තර්ජාලයෙන් අසන්නට හැකි නොවූ යුගයක, ගුවන්විදුලිය හරහා ඇසුණු ගීත රසිකයන්ගේ දෛනික ජීවිතයේ කොටසක් විය. එවැනි යුගයක මල්ලිකා කහවිටගේ හඬ රසිකයන් අතරට ගියේය.
ඇගේ ගීත පරම්පරා ගණනාවක් පසුකරමින් අද දක්වාත් මතකයේ රැඳී තිබීමෙන් පෙනී යන්නේ ජනප්රියත්වය යනු එදා ලැබුණු ප්රතිචාරයකට පමණක් සීමා වූ දෙයක් නොවන බවයි. හොඳ ගීතයක් සහ හෘදයාංගම ගායනයක් කාලය ගෙවී ගියත් රසික මතකයෙන් මැකී නොයන බව මල්ලිකා කහවිටගේ ගීත සනාථ කරයි.
ශ්රී ලාංකීය ගුවන්විදුලි සංගීතයේත්, පැරණි සිංහල සිනමා ගීතයේත් සුන්දර මතකයන් අතර මල්ලිකා කහවිටගේ හඬට හිමි වන්නේ එවැනිම ගෞරවනීය ස්ථානයකි. ඇය ගැයූ ගීත නැවත අසන සෑම අවස්ථාවකම අතීතයේ සුන්දර සංගීත යුගයක් රසික හදවත් තුළ යළිත් ජීවමාන වේ.
රෝහණ ආරියරත්න
