නව රජයේ ආර්ථික දැක්මට සමගාමීව අපනයන විෂය කෙරෙහි දක්වා ඇති පුළුල් අවධානය සැලකිල්ලට ගනිමින් ශ්‍රී ලාංකීය අපනයන සංවර්ධනයේ ඉදිරි දැක්ම පිළිබඳ වන විශේෂ සමුළුව වෙළඳ අමාත්‍ය බන්දුල ගුණවර්ධන මැතිතුමාගේ සංකල්පයක් යටතේ පසුගිය දා (29) හෝමාගම NSBM හරිත විශ්වවිද්‍යාලයේ දී පැවැත්විණි. වෙළඳ අමාත්‍යාංශය සහ ශ්‍රී ලංකා අපනයන සංවර්ධන මණ්ඩලය එක්ව මෙම සමුළුව සංවිධානය කෙරිණි.
සමුළුව සඳහා වෙළඳ අමාත්‍ය ආචාර්ය බන්දුල ගුණවර්ධන, සමුපකාර සේවා, අලෙවි සංවර්ධන හා පාරිභෝගික ආරක්ෂණ රාජ්‍ය අමාත්‍ය ලසන්ත අලගියවන්න,ගුවන් සේවා සහ අපනයන කලාප සංවර්ධන රාජ්‍ය අමාත්‍ය ඩී.වී.චානක, වෙළඳ අමාත්‍යාංශ ලේකම් ජේ.එම්.බී. ජයවර්ධන, සමුපකාර සේවා, අලෙවි සංවර්ධන හා පාරිභෝගික ආරක්ෂණ රාජ්‍ය අමාත්‍යංශ ලේකම් කේ. ඩී. එස්. රුවන්චන්ද්‍ර, අපනයන සංවර්ධන මණ්ඩලයේ අධ්‍යක්ෂ ජනරාල් චිත්‍රාන්ජලී දිසානායක, මහාචාර්ය ජනක් කුමාරසිංහ, ආචාර්ය ජානක ප්‍ර‍නාන්දු, ආචාර්ය සුමුදු පෙරේරා යන සම්භාවනීය අමුත්තන් මෙන් ම අපනයනකරුවන්,වෙළද අමාත්‍යංශයට සම්බන්ධ ආයතන ප්‍ර‍ධානීන්,ඇතුළු පිරිසක් ද සහභාගී විය.
මෙම අවස්ථාවට එක්වෙමින් වෙළඳ අමාත්‍ය ආචාර්ය බන්දුල ගුණවර්ධන මහතා සදහන් කලේ මෙරටට විශාල විදේශ විනිමය ප්‍ර‍මාණයක් ගෙන එන අපනයනකරුවන් මුහුණදෙන ගැටළුවලට ප්‍රායෝගික සහ යතාර්තවාදී විසදුම් ලබාදීමට කටයුතු සිදුකරන බවයි.තවදුරටත් අදහස් දක්වමින් අමාත්‍යවරයා සදහන් කලේ මෙරට අපනයන ඉපැයුම් ප්‍රමාණය දෙගුණ කිරීම සදහා උපදේශකත්වය, අනුග්‍ර‍ය සහ අපනයනකරුවන්ගේ අත්දැකීම් අමාත්‍යංශය වෙත යොමුකරන ලෙසයි. තවද ශ්‍රී ලංකා අපනයන සංවර්ධන පනත කෙරෙහි අවධානය යොමුකරමින් අපනයන ක්ෂේත්‍රයේ ගැටළු කඩිනමින් විසදීම සඳහා අද දිනයේ අපනයන සංවර්ධන අමාත්‍ය සභාව සංස්ථාපනය කළ බවත් ජනාධිපතිතුමා ඒ සම්බන්ධයෙන් යොමුකළ පත්වීමේ ලිපියද අද දින ලැබුණු බවත් ඒ අනුව අද දිනය ඓතිහාසික දිනයක් බවද ප්‍රකාශ කරන ලදි.
තවදුරටත් අපනයනකරුවන් අමතමින් අමාත්‍යවරයා කියා සිටියේ අපනයන සංවර්ධන සැලැස්මක් සකසමින් එය අමාත්‍ය මණ්ඩල අනුමැතියට යොමුකරන බවයි. මූලික ප්‍ර‍ශ්නවලට පිළිතුරු ලබාදීමට සූදානම් වගේම ඉදිරියේදී අපනයනය සම්බන්ධ ප්‍ර‍තිපත්තිමය තීරණ ගත හැකි බවයි.මෙරට මුහුණ දී තිබෙන ආර්ථික අර්බුදය කළමණාකරනය කිරීම අපනයනකරුවන්ට කළ හැකි බවද ඒ වෙනුවෙන් වැඩකටයුතු සිදුකිරීමට සුදානම් බවද අමාත්‍යවරයා සඳහන් කළේය.
ඒ අනුව අපනයන වර්ධනය කිරීම සදහා ප්‍රධාන ක්‍ර‍ම තුනක් පිළිබද අවධානය යොමුකළ අමාත්‍යවරයා භාණ්ඩ විවිධාංගීකරණය කිරීම,වෙළදපොළ විවිධාංගීකරණය කිරීම සහ නවීකරණය කළ අපනයන ක්‍ර‍මයක් ස්ථාපනය කිරීම එහිදී වැදගත් බව අවධාරණය කරන ලදී.තවද අපනයන සංවර්ධනය සදහා පර්යේෂණ සිදුකිරීමටද අවධානය යොමුකරමින් අපනයන කරුවන්ට අඩුපාඩුවක්ව පවතින අපනයන සංවර්ධන බැංකුවක් මෙරට ඇතිකිරීමට ඉදිරීයේදී කටයුතු සිදුකරන බවයි. මහාචාර්ය ජනක් කුමාරසිංහ, ආචාර්ය ජානක ප්‍ර‍නාන්දු, ආචාර්ය සුමුදු පෙරේරා යන මහත්ම මහත්මීන් විසින් ජාත්‍යන්තර වෙළදාම පිළිබද සාකච්ජාවක්ද සිදුකළ අතර අපනයන කරුවන් මුහුණ දෙන ගැටළුවලටද අමාත්‍යවරයා ප්‍ර‍මුඛ විද්වත් සභාව අවධානය යොමුකිරීමට කටයුතු කරන ලදි.
