විදර්ශන ප්‍රකාශනයක් වන මෙම කෘතිය ගැන කතුවරයා සිය ෆේස්බුක් පිටුවෙහි මෙවන් සටහනක් පළ කර තිබුණි.
“– කෝපි අවන්හලක සටහන –
බල්සාක් කැෆේ තීරු ලියවිල්ල මා ලියන්නට පටන් ගත්තේ මා උපන්ගම වන කළුබෝවිල මිත්‍රයකු සේම චිරකාලීන පත්තරකාර මිත්‍රයකු ද වන ‘අනිද්දා’ පත්තරයේ ප්‍රධාන සංස්කාරක කේ.ඩබ්ලිව්. ජනරංජනගේ ඉල්ලීම හන්දා ය. කොලම ලියන්නට පටන් ගනිද්දී ම නාමකරණය හරහා නැඟෙන තේමාත්මක මානය ලෙස මා සඳහන් කළ වචන මෙයාකාරය විය.
‘’බල්සාක් කැෆේ. ඔබ දකින, කියවන, හඟින දෛනික ජීවිතයේ, මඟහැරෙන නිමේෂ.
‘මානව ප්‍රහසනයේ’ සංස්කෘතික දේශපාලනය.
මෙය කෘතියක් ලෙස පළවන මොහොතේ අනිද්දා ප්‍රධානී ජනරංජන, එහි නියෝජ්‍ය සංස්කාරක මා මිත්‍ර ලසන්ත රුහුණගේ ඇතුළු සනුහරය සිහිපත් කරමි. එ මෙන් ම මෙම කොලම පත්තරයේ පළවූ පසු අන්තර්ජාලය හරහා පාඨක සමාජය වෙත ගෙන ගිය ‘ද ලීඩර් ඩොට් එල් කේ’ වෙබ් අඩවියේ නියාමක රුවන් ෆර්ඩිනැන්ඩෝ මෙන් ම එම වෙබ් ලියවිල්ලෙහි අන්තර්ගතය පෝෂණය කිරීම වෙනුවෙන් එය විවිධ මූලාශ්‍රයන්ගෙන් සන්නද්ධ කළ අභිෂේකා වාසලබණ්ඩාරට ද කෘතඥපූර්වක වෙමි.
මෙහි එන ලියවිලි වෙනුවෙන් මට අනුප්‍රාණයක් වූ රෝහිත භාෂණ අබේවර්ධන, අතුල විතානගේ, ඥානසිරි කොත්තිගොඩ හා කේ. විජේසිංහ සහෝදරයන් ආදරයෙන් සිහිපත් කරමි.
ඉදිරිගාමී දැක්මක් සහිත විදර්ශන ප්‍රකාශන ක්‍රියාවලි ඉතිහාසයේ පළමු කොළම කෘතිය බවට පත්වන “බල්සාක් කැෆේ” සඳහා අනුමැතිය හා ශක්තිය ලබා දුන් විදර්ශන ප්‍රකාශනාධිපති මා චිරකාලීන මිත්‍ර ජනක ඉනිමංකඩ මෙන්ම එම මැතිණිය, මා චිරකාලීන මිත්‍රවරී තුෂාරි මානවඩු සුපුරුදු මිත්‍රත්වයෙන් මෙනෙහි කරමි. එමෙන්ම මෙම කෘතිය මුළුමනින්ම සැලසුම් කළ මිත්‍රවරී ධම්මිකා සිරිවර්ධන, අක්ෂර – වෑකරණ වින්‍යාස පෙර වැරදි නිවැරදි කළ මිත්‍ර කිවියර ලහිරු කරුණාරත්න සහ ‘ බල්සාක්’ කවරය ෆ්‍රන්ස ධජයෙහි වර්ණාවලියෙන් සන්නද්ධ කර කෘතියට නව අර්ථකථනයක් උත්පාද කර දුන් මිත්‍ර කිවියර විකුම් ජිතේන්ද්‍ර හට අප්‍රමාණ සැලියුට් පුද කරමි.
මංජුල වෙඩිවර්ධන
2024 ගිම්හානය කෙළවර
පැරීසිය
ෆ්‍රන්සය
(දොස්දෙවූස්කිගේ අත්සන සහිත මග්ගෙක පසුබිමෙහි වන ‘බල්සාක් කාෆේ’ මුද්‍රිත කෘතිය සහිත මෙම සේයාරුව ජනක ඉනිමංකඩ මිත්‍රවරයා විසින් අද උදෑසන වට්සැප් කරන ලද්දකි)
