ඔක්තෝබර් 23 වැනිදා මුලතිව්, පාන්ඩිකුලම් හන්දියේ සිට මාන්තෙයි නැගෙනහිර ප්‍රාදේශිය ලේකම් කාර්යාලය දක්වා විරෝධතා පෙළපාලියකින් පැමිණි වන්නිවිලන්කුලම් ගොවීන් එහිදී උද්ඝෝෂණයක් දියත් කරමින් ඉල්ලා සිටියේ 2014 වසරේදී ප්‍රාදේශිය ලේකම් කාර්යාලය වගා කටයුතු සදහා තුවරන්කුලම් කුඹුරු ඉඩම් පවරා දෙමින් නිකුත් කළ බලපත්‍ර වල සත්‍ය මුල් පිටපත් ලබා දෙන ලෙසයි.
උතුරු පළාත් සභාවේ හිටපු මන්ත්‍රී තුරෙයිරාසා රවිහරන් පවසන පරිදි යුද්ධය හේතුවෙන් වන්නිවිලන්කුලම් වැසියන් සිය ගම් බිම් මෙන්ම පාරම්පරිකව ගොවි තැන් කළ භුමිද අතහැර ජීවිත ආරක්ෂාව පවා වෙනත් ප්‍රදේශවලට පලා ගොස් තිබෙන අතර යුද්ධය නිමා වීමෙන් පසු 2010, 2011 වසර වලදී ඔවුන් යළි සිය මුල් ගම් බිම් වල පදිංචියට පැමිණ තිබේ.
නැවත පදිංචි වීමෙන් පසු, යුද්ධයට පෙර පාරම්පරික වගා කටයුතු වල නියැලුන භුමි සුද්ධ පවිත්‍ර කරමින් ඔවුන් යලිත් වරක් ගොවිතැන් කටයුතු ආරම්භ කිරීමට සුදානම් වෙද්දී, වන සංරක්ෂණ දෙපාර්තමේන්තුව ඔවුන්ට දැනුම් දී ඇත්තේ එම භුමි වන සංරක්ෂණ දෙපාර්තමේන්තුවට අයත් බවයි.
ප්‍රදේශයේ ජනයා වසර තුනකට අධික කාලයක් වගා කටයුතු සදහා ඉඩම් ලබා දෙන ලෙස මාන්තෙයි, නැගෙනහිර ප්‍රාදේශිය ලේකම් කාර්යාලයෙන් සිදු කළ ඉල්ලීම්වල ප්‍රතිළුලයක් වශයෙන් 2014 වසරේදී එක් අයකුට අක්කර 2 බැගින් පවුල් 58 ක් සදහා ප්‍රාදේශිය ලේකම් කාර්යාලය විසින් තුවරන්කුලම් ප්‍රදේශයේ කුඹුරු ඉඩම් බලපත්‍ර පිටපතක් සහිතව ලබා දීමට කටයුතු කර ඇති බවයි තුරෙයිරාසා රවිහරන් පවසන්නේ.
එහෙත් මේ දක්වා එම කුඹුරු ඉඩම් සදහා බලපත්‍රයේ මුල් පිටපත ගොවීන් වෙත ලබා නොදීම නිසා ගොවිතැන් කටයුතු කිරීමට සුදානම් වෙද්දී වන සංරක්ෂණ දෙපාර්තමේතුව එයට බාධා පමුණුවන බව සදහන් කරන ගොවීන් අවධාරණය කරන්නේ කෘෂිකාර්මික කටයුතු සිදු කරගැනීමට නොහැකි වීමෙන් තමන් මහත් දුෂ්කරතාවන් රැසකට මුහුණ දී සිටින බවයි.
විරෝධතාවය අවසානයේ සිය ඉල්ලීම් ඇතුලත් සන්දේශයක් සහකාර ප්‍රාදේශිය ලේකම් ජේ. මයුරන් වෙත ලබා දීමට ගොවීන් කටයුතු කර ඇති අතර ඒ සම්බන්ධයෙන් ඉහළ නිලධාරීන්ගේ අවධානයට ලක් කර ඉදිරි ක්‍රියාමාර්ග ගන්නා බවට රජයේ නිලධාරියා ගොවීන්ට පොරොන්දු වී ඇත.
තමිල් ඊළාම් විමුක්ති සංවිධානයේ නායක පාර්ලිමේන්තු මන්ත්‍රී සෙල්වම් අඩෛක්කලනාදන්, ටෙලෝ පාර්ලිමේන්තු මන්ත්‍රී විනෝ නෝහරාදලිංගම්, හිටපු පාර්ලිමේන්තු මන්ත්‍රීවරුන් වන ශාන්ති ශ්‍රී ස්කන්ධරාජා හා එස් ශිවමෝහන්, බහුජන සංවිධාන ක්‍රියාධරයන්වූ පීටර් ඉලන්චේලියන් ද විරෝධතාකරුවන්ට සහාය පළ කළ බව පළාත් බද වාර්තාකරුවෝ වැඩි දුරටත් පවසති.
theleader.lk
