මැලේසියාවේ උපාධිය හදාරන ශ්‍රී ලාංකික සිසුන්ගේ වීසා කාලය වසර 4කින් දීර්ඝ කරන ලෙස නැගෙනහිර පළාත් ආණ්ඩුකාරවරයා මැලේසියානු උසස් අධ්‍යාපන අමාත්‍යවරයාගෙන් ඉල්ලීම් කරයි!
-උසස් අධ්‍යාපන අමාත්‍යවරයාගෙන් යහපත් ප්‍රතිචාර –
මැලේසියාවේ නිල සංචාරයක නිරත නැගෙනහිර පළාත් ආණ්ඩුකාර සෙන්තිල් තොණ්ඩමාන් මහතා මැලේසියාවේ උසස් අධ්‍යාපන අමාත්‍ය ෂම්බ්‍රි අබ්දුල් කදීර් මහතා හමුවී ශ්‍රී ලංකාව සහ මැලේසියාව අතර ඒකාබද්ධ ව්‍යාපෘතිය පිළිබඳව සාකච්ඡා කළේය.
මැලේසියාවේ උසස් අධ්‍යාපනය ලබන ශ්‍රී ලාංකික සිසුන් 3800කට අධික සංඛ්‍යාවක් දැනට පවතින නීතියට අනුව වීසා බලපත්‍ර අලුත් කර ගැනීම සඳහා වසර දෙකකට වරක් ශ්‍රී ලංකාවට පැමිණිය යුතුය. එබැවින් ඔවුන්ගේ උපාධිය සම්පූර්ණ කිරීමට කාලය වන වසර 4 දක්වා වීසා කාලය දීර්ඝ කරන ලෙස ආණ්ඩුකාරවරයා මැලේසියාවේ උසස් අධ්‍යාපන අමාත්‍ය ෂම්බ්‍රි අබ්දුල් කදීර්ගෙන් ඉල්ලා සිටියේය. ආණ්ඩුකාරවරයාගේ ඉල්ලීමට අනුව අවශ්‍ය පියවර ගැනීමට තමන් පියවර ගන්නා බව අමාත්‍යවරයා පැවසීය.
මැලේසියාවට යන සිසුන් සහ ශ්‍රමිකයින් සඳහා ශ්‍රී ලංකාවේ මැලේ භාෂා පුහුණුව ආරම්භ කිරීම සහ මැලේසියාව සහ ශ්‍රී ලංකාව අතර අධ්‍යාපනය සම්බන්ධ ඒකාබද්ධ හුවමාරු වැඩසටහන් පිළිබඳව ද මෙහිදී සාකච්ඡා කෙරිණි.
මෙම සාකච්ඡාවට පාර්ලිමේන්තු මන්ත්‍රී දටුක් ශ්‍රී සරවනන් මුරුගන් මහතා සහ මැලේසියාවේ ශ්‍රී ලංකා තානාපති සුමංගල ඩයස් මහතා සහභාගී විය.
