මුලතිව් මහේස්ත්රාත් ටී. ප්‍රදීපන් සැප්තැම්බර් 21 වැනිදා එම වරෙන්තුව නිකුත් කර ඇත්තේ සිව් වසරකට පෙරමාධ්‍යවේදී ෂන්මුගම් තවසීලන්ට තර්ජනයක් කළ නාවික හමුදා බුද්ධි අංශ සාමාජිකයකුට බවයි පළාත් බද වාර්තාකරුවන් පවසන්නේ.
2009 වසරේ මැයි මාසයේදී ලේ වැකි නිමාවකට පත් වූ කුරිරු සිවිල් යුද්ධය අවසානයේ දී හමුදාවට භාර දී‍ම‍ෙන් පසු සිය සමීපතමයන් බලහත්කාරයෙන් අතුරුදහන් කරවීම නිසා ශෝකයට පත් දෙමළ මව්වරුන් සහ ඥාතීන්, සිය ශාරීරික හා මානසික පීඩා විඳගනිමින් සිය සමීපතමයන් ස‍ෙවීමේ අඛණ්ඩ අරගලයක දින 2400 ට වැඩි කාලයක් තිස්සේ නිරතව සිටී.
වසර හයකට පෙර ආරම්භ කරන ලද ලද ඔවුන්ගේ මෙම අඛණ්ඩ අරගලය අතරතුරදී, යුක්තිය නොලබාම අවම වශයෙන් ඥාතීන් 180 ක් මේ වන විටත් මිය ගොස් තිබේ.
යුද්ධයෙන් විනාශයට පත් මුලතිව් හි, මාධ්‍ය සමාජයේ ප්‍රධානියා ද වන මාධ්‍යවේදී ෂන්මුගම් තවසීලන්, බලහත්කාරයෙන් අතුරුදහන් කරවූවන්ගේ පවුල්වල සාමාජිකයන් 2019 අප්‍රේල් 07 වන දින මුලතිව් දිස්ත්‍රික් ලේකම් කාර්යාලය ඉදිරිපිටින් ආරම්භ කර වට්ටුවාකල් පාලම දක්වා ගමන් කළ විරෝධතා පෙළපාලියක් වාර්තා කිරීමෙහි යෙදී සිටියේය.
ඔහු ඇතුළු මාධ්‍යවේදීන් මෙම විරෝධතාවය වාර්තා කරමින් සිටියදී නාඳුනන පුද්ගලයකු විසින් මාධ්‍යවේදීන්ට සහ විරෝධතාකරුවන්ට තර්ජනය කිරීමට අමතරව ඔවුන් රූගත කර තිබේ.
විරෝධතාකරුවන් මෙම නන්නාඳුනන තැනැත්තා විසින් සිදු කරන රූගත කිරීම් නැවැත්වීමට උත්සාහ කරන අතරතුර, මාධ්‍යවේදී තවසීලන් මැදිහත් වී එම පුද්ගලයා කවුරුන්ද, ඔහු විරෝධතාව රූගත කළේ ඇයිද යන්න සහ ඔහුගේ ජංගම දුරකථනයෙන් සිදුකළ පටිගත කිරීම පිළිබඳව ද විමසා ඇත.
මාධ්‍යවේදියාගේ එම ප්‍රශ්න වලට පිළිතුරු දෙනු වෙනුවට, එම ස්ථානයෙන් පලා යාමට උත්සාහ කළ එම පුද්ගලයා විරෝධතාකරුවන් විසින් ලුහුබැඳ ගොස් අල්ලා ගත් පසු තමන් නාවික හමුදා නිලධාරියකු බව පිළි‍ග‍ෙන තිබේ.
එම ස්ථානයට පැමිණෙන ලෙස විරෝධතාකරුවන් මුලතිව් පොලිසි‍ය‍ෙන් ඉල්ලීම් සිදු කර තිබුනද, ඔවුන් පැමිණ නැත. එබැවින් විරෝධතාකරුවන්ට සහ මහජනතාවට හසුවූ මෙම පුද්ගලයා ගෝඨාභය නාවික හමුදා කඳවුරට රැගෙන යාමෙන් පසු ඔහු නාවික හමුදා නිලධාරියකු බව එහි නිලධාරීන් තහවුරු කර ඇත.
පසුව කඳවුරට පැමිණි පොලිසියට මෙම පුද්ගලයා බාර දුන් විරෝධතාකරුවන් ආපසු ගොස් ඇත. ඉන් අනතුරුව එම නාවික හමුදා නිලධාරියා සහ ඔහුගේ සාක්ෂිකරු ලෙස පැමිණි තවත් නාවික නිලධාරියෙක් මාධ්‍යවේදීයාට එරෙහිව ව්‍යාජ කරුණු ඉදිරිපත් කරමින් මුලතිව් පොලිසියේ පැමිණිල්ලක් ගොනු කර තිබේ.
එම පැමිණිල්ල බාරගත් පොලිසිය විසින් මාධ්‍යවේදී තවසීලන් කැඳවා අත්අඩංගුවට ගෙන අධිකරණයට ඉදිරිපත් කරන ලදුව ඇප මත මුදා හැර තිබුනි.
ඊට අදාල නඩුව 2023 සැප්තැම්බර් 21 වැනි දින මුලතිව් මහේස්ත්රාත් අධිකරණයේ දී විභාගයට ගත් අවස්ථාවේදී පැමිණිලිකාර නාවික හමුදා බුද්ධි අංශ නිලධාරියා නඩුවිභාගයට පෙනී සිටීමට පැමිණ තිබු‍නේ නැත. ඒ අනුව නාවික හමුදා බුද්ධි අංශ නිලධාරියා සහ ඔහුගේ සාක්ෂිකරු ලෙස පොලීසියට පැමිණිල්ල ගොනු කළ අනෙක් නිලධාරියාද අත්අඩංගුවට ගෙන අධිකරණයට ඉදිරිපත් කිරීම සඳහා මුලතිව් මහේස්ත්රාත් ටී. ප්‍රදීපන් වරෙන්තු නිකුත් කර තිබේ.
මෙම නඩුව 2023 මැයි 04 වැනි දින මුලතිව් මහේස්ත්රාත් අධිකරණයේ දී විභාගයට ගත් අවස්ථාවේදී පැමිණිලිකාර නාවික හමුදා බුද්ධි අංශ නිලධාරියා නඩුවිභාගයට පෙනී සිටීමට පැමිණ තිබු‍නේ නැත. එම නිලධාරියා සැප්තැම්බර් 21 වැනිදා අධිකරණයට කැඳවීමට මුලතිව් මහේස්ත්රාත් ටී. සරවනරාජා එදින සිතාසි නිකුත් කර තිබුනි.
මෙම නඩුව 2024 පෙබරවාරි 29 වැනිදා යළි කැදවීමට නියමිතය.
ප්‍රදේශවාසීන් පවසන්නේ මාධ්‍යවේදී තවසීලන්ට එරෙහිව නාවික හමුදා නිලධාරියා විසින් ගොනු කර පෙත්සම “නිෂ්පල සහ වැදගැම්මකට නැති හුදු පළිගැනීමේ චේතනාව‍ෙන් සිදු කරන ලද ක්‍රියාවක්” බවයි.
ආරක්‍ෂක අංශ වලින් සිදු කරනු ලබන බිය ගැන්වීම්, මරණ තර්ජන සහ පහරදීම් ද නොතකා, දිවයිනේ වඩාත්ම මිලිටරිකරණය වූ ප්‍රදේශයේ, රාජ්‍ය අනුග්‍රහය සහිතව සිදු කරනු ලබන අපරාධ ඇතුළු දෙමළ ජනයා මුහුණ දී සිටින ගැටළු සම්බන්ධයෙන් මාධ්‍යවේදී ෂන්මුගම් තවසීලන් වාර්තාකරණයේ නියැලී සිටි.
theleader.lk
