නව වසරේ ආරම්භක දිනයේ දීම යාපනයේදී මාධ්‍ය හමුවක් පවත්වමින් උතුරේ එක්සත් ධීවර සංගම් එකතුවේ සභාපති අන්නලිංගම් අන්නරාසා සඳහන් කළේ දිස්ත්‍රික් සම්බන්ධිකරණ කමිටු රැස්වීම් දේශපාලන බලවතුන්ගේ නියෝජිතයන්ට සීමා වන බවයි.
“දිස්ත්‍රික් සම්බන්ධිකරණ කමිටු රැස්වීමට දිස්ත්‍රික්කයේ ධීවර සංගම් නියෝජිතයන්ට ආරාධනා කරන්න ඕන. එහෙම නැතුව පක්ෂයක් විසින් පත් කරපු නියෝජිතයන් සහ ආධාර කරුවන් රැස්වීමට කැදවලා ඉන්දිය ධීවරයන්ගේ ප්‍රශ්නය විතරයි උතුරේ තියෙන්නේ කියලා පෙන්නන්න හිතන එක වේදනාකාරී සහ කනස්සල්ලට කාරනාවක්.”
ධීවර සංගම් නායක අන්නලිංගම් අන්නරාසා පෙන්වා දෙන්නේ ඉන්දීය ධීවරයන් මෙරට මුහුදේ අනවසරයෙන් සිදු කරන මසුන් මැරීමට අමතරව දේශිය ධීවරයන්ට බලපා තිබෙන තවත් ගැටළු කිහිපයක්ම පවතින බවයි.
“දේශීය වශයෙන් භාවිත කරන ට්‍රෝලර් තහනම් කරන්න ඕන. සුරුක්කු දැල් භාවිතය අඩු වෙලා තිබුනට 2024 ජනවාරි වල ඉදන් ඒක වැඩි වෙනවා. ඒක තහනම් කරන්න ඕන. අද වෙනකල් ඩයනමයිට් භාවිත කරලා රස්සාව කරනවා.”
යාපනයේ නීති විරෝධි ආකාරයෙන් ක්‍රියාත්මක වන මුහුදු කුඩැල්ලන් වගා කරන ගොවිපළ සංඛ්‍යාව 150ට වැඩි බව අවධාරණය කරන අන්නලිංගම් අන්නරාසා ධීවර සංගම් නායකයා මාධ්‍ය හමුවේදී තව දුරටත් පෙන්වා දුන්නේ ඒ සම්බන්ධයෙන් ප්‍රදේශයේ ජනාධිපති නියෝජිතයා දැනුවත් කළද ඉන් පලක් නොවු බවයි.
“යාපනයේ මුහුදු කුඩැල්ලෝ ගොවිපළවල් 700කට අධික ප්‍රමාණයක් තියනවා. ඒකෙන් 150 ට වැඩියි නීති විරෝධි ගොවිපලවල්. පරුත්තිතීව් ප්‍රදේශයේ හදලා තියන නීති විරෝධි මුහුදු කුඩැල්ලෝ ඉවත් කරන ලෙස ඉල්ලීම් කරලා පළාත් ආණ්ඩුකාර කාර්යාලයේ, දිස්ත්‍රික් ලේකම් කාර්යාලය දක්වා ගිහිල්ලා උද්ඝෝෂණ කරලා සන්දේශයක් භාර දීලත් කිසි පියවරක් අරන් නෑ. ඉතින් අපේ ප්‍රශ්න ඉදිරිපත් නොකර ඉන්දීය ධීවරයන් නිසා විතරයි අපිට හානිය කියලා කියන එක පිළි ගන්න බෑ. ”
theleader.lk
