අලුත් ව්‍යවස්ථාවක් ඉදිරිපත් කරමින් රට බෙදීමට සුදානම් වන බවට හිටපු ජනාධිපති මහින්ද රාජපක්ෂ නිතරම පැවසුවත් කිසිවකුත් රට බෙදීමක් සිදු නොකරන බව නව සම සමාජ නායකයා පවසයි.
තමන් ඇතුලු පිරිස නිරන්තරයෙන් කටයුතු කරන්නේ අනෙක් ජාතීන් සමග එකමුතුව බව සදහන් කරන ආචාර්ය වික්‍රමබාහු කරුණාරත්න චෝදනා කරන්නේ මහින්ද රාජපක්ෂ නිරන්තරයෙන් කෑ ගසන්නේ සිංහලයන්ගේ අයිතිවාසිකම් පිළිබදව පමණක් බවයි.
මේ රටේ සිංහලයන්ගේ අයිතිවාසිකම් පිළිබදව කිසිවකුත් තර්ජනයක් කර නොමැති අතර මේ රටේ තර්ජනයක් ඇත්තේ අනිකුත් ජාතීන්ට බව ආචාර්ය වික්‍රමබාහු කරුණාරත්න පවසා සිටියේ 11 බදාදා කොළඹ පැවැති මාධ්‍ය හමුවකදීය.
වතුකරයේ දෙමළ ජනතාවගේ අයිතිවාසිකම් නැතිකරදමමින් බලය බෙදීමක් සිදු කිරීමට අවශ්‍ය නොමැති බවට දිගින් දිගටම සිතමින් ක්‍රියාකළ හිටපු ජනපති ජේ.ආර් ජයවර්ධනටත් අවසානයේ බලය බෙදීමක් කළ යුතු බවට අවබෝධ වු බවයි වාමාංශික නායකයා පෙන්වා දෙන්නේ.
දෙමළ ජනතා අරගලය
තවත් ජීවිත අහිමි වුවත් තම අයිතිවාසිකම් වෙනුවෙන් තවදුරටත් දෙමළ ජනතාව නැගී සිටින බව පෙන්වා දෙන ඔහු අවධාරණය කරන්නේ එම තත්වය සමාදානයකට ගෙන එන්නේ නැතිව රට දියුණු කර ඉදිරියට ගෙනයා නොහැකි බවයි.
රජය කුමන ආකාරයේ ආර්ථික යෝජනා ඉදිරිපත් කළත් ඒවා වැදගත් වන නමුත් රටේ දැනට පවතින ආණ්ඩුක්‍රම ව්‍යවස්ථාව වෙනස් කර සියලු ජාතීන්ට සාධාරණ අයිතීන් ලැබෙන නව ව්‍යවස්ථාවක් සකස් කරන තෙක් අගමැති රනිල් වික්‍රමසිංහට තියා “ගණ දෙයියන්වහන්සේටවත්” රට සංවර්ධනය කිරීමට නොහැකි බවයි ආචාර්ය වික්‍රමබාහු කරුණාරත්න එහිදී දැඩිව අවධාරණය කර සිටියේ.
මේ වන විටත් නව ව්‍යවස්ථාව සකස් කිරීම කල් ගොස් ඇති අතර එයට බාදා කරන්නේ ශ්‍රී ලංකා නිදහස් පක්ෂය බවට චෝදනාව එල්ල වී ඇති පෙන්වා දෙන වාමාංශික නායකයා පවසා සිටියේ එම තත්වයෙන් එළියට පැමිණ සියලු ජාතීන්ට පිළිගත හැකි නව ආණ්ඩුක්‍රම ව්‍යවස්ථාවක් සකස් කිරීමට කටයුතු නොකළහොත් මේ රට ප්‍රභල ප්‍රශ්නයක් ඇති විය හැකි බවයි.
www.gagana.com
