දෙමළ දේශපාලන සිරකරුවන් නිදහස් කරන බවට ‘පොහොට්ටු’ පක්ෂයේ ජනාධිපති අපේක්ෂක ගෝඨාභය රාජපක්ෂ උතුරේ දී කරන ලද ප්‍රසිද්ධ ප්‍රකාශයක් ඔහුගේ මැතිවරණ ප්‍රචාරක ව්‍යාපාරය
විසින් දකුණට වසන් කර තිබේ.
ඔහු යාපනයේදී කියා තිබුනේ ත්‍රස්තවාදී චෝදනා යටතේ අත් අඩංගුවේ සිටින සිරකරුවන් නිදහස් කරන බවයි.
“අපි එල්ටීටීඊ සාමාජිකයින් 13,000 ක් පුනරුත්ථාපනය කර නිදහස් කර ඇත්තෙමු. පන්දහසකට වැඩි සිරකරුවන් අතරින් 274 ක් හැර අන් සියල්ලන්ම අප විසින් නිදහස් කර තිබේ. මම ජනාධිපති ධුරයට පත් වු විට ඉතිරි සියල්ලම පුනරුත්ථාපනය කර නිදහස් කරන බවට මම පසුගිය සඳුදා යාපනයේ ජනතාවට පොරොන්දුවක් දුන්නා,” යැයි ගෝඨාබය රාජපක්ෂගේ ට්විටර් ගිණුමේ දෙමලෙන් ලියා ඇති පණිවුඩයක දැක්වේ.
එම ප්‍රකාශයේ සිංහල හෝ ඉංග්‍රීසි පණිවුඩයක් මේ මොහොත වන තෙක් දැක ගන්නට නොහැකි විය.
ගෝඨාබය රාජපක්ෂගේ ට්විටර් සටහන
යාපනයේ ජන හමුව ෆේස් බුක් ඔස්සේ කරන ලද සජිවි විකාශයේ වීඩියෝව ගෝඨාබය රාජපක්ෂගේ නිල ෆේස් බුක් පිටුවේ පල කොට ඇත්තේ එම කතාව ආරම්භ වූ විගස ගීතයක් වාදනය කොට ඉන් පසුව නැවතත් ඔහුගේ කතාව ඇසෙන්නට සලස්වමිනි.
නලලට තිලකයක් ද තබා ගෙන යාපනයේ ජනතාව අමතන ගෝඨාබය රාජපක්ගේ සජිවි විකාශය “තමුන්නාන්සේලා දෙන්නා එදා අපි දහතුන් දහසකට ආසන්න එල්.ටීටී.ඊ සාමාජියන්” යන්න සිංහලෙන් පවසනවාත් සමඟ නතර වී ඔහුගේ ප්‍රචාරක ගීතයක් ආරම්භ වන අතර ගීතය අවසන් වීම සමග නැවත සජිවි විකාශය ආරම්භ වන්නේ “මේ ප්‍රශ්න වලට මැදි වෙලා ජිවත් වෙන්නට අවශ්‍ය නැහැ,” යි ප්‍රකාශ කරනු සමගය.
පොහොට්ටුවේ ජනාධිපති අපේක්ෂකයා දකුණේදී ප්‍රකාශ කර තිබුනේ අපරාධ චෝදනා යටතේ සිරගතව සිටින සියලුම ආරක්ෂක අංශ සාමාජිකයන් බලයට පත්වූ පසුදා නිදහස් කරන බවයි.
(ceylonnews.lk)
