ජාත්‍යන්තර අතුරුදන් වූවන්ගේ දිනය සමරමින් ඊයේ (30) කටවුට් හා බැනර් ප්‍රදර්ශනය කරමින් පැවැත්වීමට සංවිධානය කළ පෙළපාළියක් තහනම් කළ ත්‍රිකුණාමලය ප්‍රධාන මහේස්ත්‍රාත් ඊ. පායාස් රසාක් මහතා, එය සංවිධානය කළ ත්‍රිකුණාමලය පදවිය භාර රදගුරු ක්‍රිස්ටියන් නොයෙල් එම්මානුවෙල් හිමිපාණන් ඇතුළු අට දෙනෙකුට එය සංවිධානය කිරීම වළක්වාලමින් අතුරු තහනම් නියෝගයක් නිකුත් කළේය.
ත්‍රිකුණාමලය මූලස්ථාන පොලිසිය ඒ වාර්තාවක් ඉදිරිපත් කරමින් පැවසුවේ මෙම පෙළපාළිය පැවැත්වීම තුළින් ජාතීන් අතර නොසන්සුන්තාවක් ඇතිවන බවත් මහජනතාවට හා දේපොළවලට හානි සිදුවිය හැකි බවත්ය.
ඒ අනුව 1979 අංක 15 දරන අපරාධ නඩු විධාන සංග්‍රහය 106(1) වගන්තිය ප්‍රකාරව මේ සඳහා සුදුසු නියෝගයක් නිකුත් කරන ලෙස පොලිසිය කළ ඉල්ලීමක් සලකා මහේස්ත්‍රාත්වරයා මෙම අතුරු තහනම් නියෝගය නිකුත් කළේය.
මෙහි වගඋත්තරකරුවන් ලෙස ත්‍රිකුණාමලය රදගුරු ක්‍රිස්ටියෙන් නොයෙල් එම්මානුවෙල් හිමිපාණන්, ත්‍රිකුණාමලය කාන්තා ජාලයේ සභාපති නීතිඥ මයුරන් ප්‍රශාන්තිනී, ත්‍රිකුණාමලය බලහත්කාරයෙන් අතුරුදන් කරවූවන්ගේ ඥාතීන්ගේ සංගමයේ සභාපතිනි සෙබස්තියන් දේවි, මඩකලපුව බලහත්කාරයෙන් අතුරුදන් කරවූවන්ගේ ඥාතීන්ගේ සංගමයේ සභාපතිනි අමිල නායගි, අම්පාර බලහත්කාරයෙන් අතුරුදන් කරවූවන්ගේ සංගමයේ සභාපතිනි ජී. සෙල්වරාණි, අහම් මානුෂීය සම්පත් මධ්‍යස්ථානයේ සභාපති කණ්ඩුමනී ලවකුසරාජා, මාධ්‍යවේදී කාර්තික් හයදීපන් හා රාමනාදන් ශ්‍රී ඥානේස්වරන් නොහොත් කන්නන් පොලිසිය නම් කර තිබුණි.
අදාළ අධිකරණ නියෝගයේ පිටපත් වගඋත්තරකරුවන් වෙත පෙරදින රාත්‍රී භාර දීමට පොලිසිය කටයුතු කර තිබුණි. මේ අතර පෙළපාළිය සඳහා ත්‍රිකුණාමලය මඩකලපුව, අම්පාර දිස්ත්‍රික්වලින් පැමිණි පිරිස් පෙළපාළි පවත්වනු වෙනුවට ත්‍රිකුණාමලය මුහුදු වෙරළේ සිට විරෝධතාවයක් පැවැත්වීමට කටයුතු කරනු ලැබීය. බලහත්කාරයෙන් අතුරුදන් කර වූවන්ගේ සංවිධාන මෙය සංවිධානය කර තිබුණි.
ත්‍රිකුණාමලය විශේෂ ඒ.ටී.එම්. ගුණානන්ද
