නාවලපිටියේ පිහිටි දුම්රිය සේවක විවේකාගාරයට යන දුම්රිය රියැදුරන් දෙදෙනකු සහ දුම්රිය ආරක්ෂක නිලධාරීන් සිව්දෙනකු වෙනුවෙන් හැටන් දුම්රිය ස්ථානයේ සිට නාවලපිටිය දුම්රිය ස්ථානයට වසර තුනක් තිස්සේ දිනපතා ධාවනය කෙරුණු දුම්රියක් වහාම නතර කරන ලෙස දුම්රිය සේවා රාජ්‍ය ඇමැති සී.බී. රත්නායක මහතා නියෝග කර ඇත.
හැටන් දුම්රිය ස්ථානයේ හදිසි නිරීක්ෂණ චාරිකාවක යෙදුණු රාජ්‍ය ඇමැතිවරයාට මෙම සුවිශේෂී දුම්රිය ගැන දැනගන්නට ලැබුණු විට ඔහු හැටන් දුම්රිය ස්ථානාධිපතිවරයාට සහ අදාළ දුම්රිය බලධාරීන්ට එම නියෝගය නිකුත් කර ඇත.
දිනපතා කොළඹින් දවල් 12.15ට ගමන් ආරම්භ කරන මගී ප්‍රවාහන දුම්රිය මහනුවරට ළඟාවීමෙන් පසුව එහි සිට හැටන් දුම්රිය ස්ථානයට ධාවනය කෙරේ.
දිනපතා රාත්‍රි 8.30 ට හැටන් දුම්රිය ස්ථානයට ළඟා වන එම දුම්රියේ මැදිරි කිහිපයක් හැටන් දුම්රිය ස්ථානයේ ගාල්කෙරෙන අතර ඉන්පසුව දුම්රිය එන්ජිම සහ ආරක්ෂක නිලධාරින් ගමන්ගන්නා මැදිරිය පමණක් කිලෝමීටර 50 පමණ එපිටින් පිහිටි නාවලපිටිය දුම්රිය ස්ථානය වෙත ධාවනය කෙරේ. මෙම දුම්රියේ ගමන් ගන්නේ නාවලපිටියේ දුම්රිය සේවක විවේකාගාරය බලායන දුම්රිය රියදුරන් දෙදෙනකු සහ ආරක්ෂක නිලධාරීන් සිවු දෙනෙකු පමණි. මගීන්ට එම දුම්රියෙන් ගමන්කිරීමට ඉඩ නොලැබේ.
පසුදින අලුයට 3.00ට එම දුම්රිය නාවලපිටිය දුම්රිය ස්ථානයෙන් හැටන් දුම්රිය ස්ථානය වෙත ධාවනය කෙරෙන අතර එහිදී සෙසු දුම්රිය මැදිරිද අමුණාගෙන අලුයම 5.30 ට මහනුවර බලා ධාවනය කෙරේ.
නාවලපිටිය දුම්රිය ස්ථානයේ දුම්රිය එන්ජිම ගාල්කර තැබෙන මුළු කාලය තුළදීම දුම්රිය එන්ජිම ක්‍රියා විරහිත නොකරන බවටද තමාට පැමිණිලි ලැබී තිබිණියැයි රාජ්‍ය ඇමැති සී.බී. රත්නායක මහතා කීය.
දුම්රිය රියැදුරන් දෙදෙනකුට සහ ආරක්ෂක නිලධාරීන් සිවුදෙනකුට විවේක ගැනීම සඳහා කාලයක් තිස්සේ විශාල වියදමක් දරමින් හැටන් සිට නාවලපිටියට දුම්රියක් ධාවනය කෙරී ඇති බව කී රත්නායක මහතා තවදුරටත් මීට ඉඩ දිය නොහැකි නිසා මින් ඉදිරියට දිනපතා එම දුම්රිය හැටන් දුම්රිය ස්ථානයේ ගාල්කර තබන ලෙස නියෝග කළ බවද පැවසීය.
දුම්රිය සේවය ලාබ ලබන තත්ත්වයට පත්කර දුම්රිය ස්ථාන හරිත දුම්රිය ස්ථාන බවට පත්කිරීම තම අරමුණ බවද රත්නායක මහතා කීය.
(lankadeeoa.lk)
